Membru Parlamentu Nasional husu ba reprezentante especial Sekretariu Jeral Nasoens Unidas iha Guine Bissau, Doutor Jose Ramos Horta ne’ebe hala’o knar misaun paz no dame nian iha ne’eba, atu matan moris neon nain (kuidadu an) husi konflitu ne’ebe akontese iha rai ne’eba.
Deputada Carmelita Caetano Moniz, hato’o ida ne’e tanba iha fulan Setembru sei hala’o eleisaun iha Guine Bissau, iha tinan 2013 ne’e.
“Ohin ita bo’ot hato’o katak,se la sala fulan Setembru ka Novembru sei halo eleisaun iha Guine Bissau, oinsa kestaun seguransa iha rai laran rasik,liu-liu seguransa ba ita bo’ot ho ajensia Timor-Leste nian iha ne’eba hodi fo tulun atu halao ita bo’ot nia knar todan ida ne’e,” Deputada Moniz dehan, hafoin Horta hato’o nia susesu durante hala’o knar iha Guine Bissau, iha PN.
Deputada ne’e dehan, nudar Timor oan sente laran taridu oituan ba Horta nia seguransa iha Guine Bissau, liu-liu bainhira hala’o eleisaun iha rai ne’eba.
“Nudar Deputada nudar mos timor oan ida, hau orgolhu tebes ba ita bo’ot, ita bo’ot simu responsabilidade ho knar ida ne’ebe ke bo’ot, todan teb-tebes no hau espera ,katak ita bo’ot bele hala’o ita bo’ot nia knar ho susesu, tanba susesu ne’ebe ita bo’ot hetan iha neba nudar susesu ba Timor –Leste tomak,” Deputada Moniz esperansa.
Iha fatin hanesan,Deputada Maria Lurdes Bessa, kongratula ba Doutor Jose Ramos Horta no mos ba povu Guine Bisau tanba konsege hili dalan dialogu no inklusaun, atu resolve problema ne’ebe akontese ha sira nia rai.
“Pasus pozitivu barak hakat tiha ona, maibe mos presiza kontinuasaun involvementu komunidade internasional nian,” Deputada Bessa katak.
Hanesan mos uluk akontese iha Timor-Leste, nia esperansa ,katak komunidade internasional nafatin hatudu sira nia solidariedade no komitmwntu atu ajuda povu Guine Bissau, hodi ultrapassa krizi bo’ot ne’e.
“Parlamentu nasional ida ne’e apoia maka’as ita bo’ot nia servisu iha Guine Bissau nudar reprezentante especial ONU ninian, e Komisaun B do Parlamentu Nasional iha intensaun no hanoin ida atu ba vizita Guine Bissau,” Deputada Bessa informa.
Entretantu reprezentante espesial Sekretariu Jeral ONU iha Guine Bissau, Doutor Jose Ramos Horta, hateten seguransa ba nia an laiha problema e hanesan iha nia rain rasik Timor-Leste, bele la’o ho livre.
“Hau la’o ba mai iha Guine Bissau sosa modo, sosa ikan no sosa boek, nunka problema. Hau nia seguransa hau entrega liu ba Maromak duke ba seluk,” Horta dehan.
Maibe nia dehan, bainhira nia ba merkadu iha ne’eba, entaun negosiante sira komesa hasa’e ona sasan nia presu.
“Ita ne’e manan osan diak,ne’e bele fahe, kuitadu inan kiak sira iha merkadu, laiha buat ida,” Horta konta.
Kona ba planu vizita husi Komisaun B ba Guine Bissau, Horta dehan, ne’e importante tebes nune’e bele fahe esperiensia ne’ebe iha ba sira.
“Ita bo’ot sira bele ba fahe esperiensia, hare rasik ita bo’ot sira nia matan,dezafiu sira iha ne’eba,” Horta apoia.
Nia informa, problema ne’ebe dadauk ne’e akontese iha Guine Bissau, mak problema odiu vingansa la para.
“Hau bele hateten, hahu kedan iha 1973, wainhira elementus rasik oho sira nia lider, fundador Amilca Cabral, to’o ohin loron siklu violensia odiu vingansa oi-oin la para, kuaze 40 anos ona,” Horta informa.
