Komunidade suku Luro, distritu Lautem la asesu ba eletrisidade durante semana rua ona, tanba ne’e sira husu ba governu atu toma atensaun ba kestaun ne’e.
Leonardo Monteiro, nudar komunidade suku Luro hateten, kauza ahi mate iha sira nia suku tanba udan bo’ot ne’ebe akontese iha fulan kotuk, estraga tiha airin eletrisidade sira ne’e.
“Ami semana rua liu ona la asesu ba eletrisidade, tanba kauza husi udan bo’ot foin lalais ne’ebe airin balun tohar,” Monteiro dehan, iha Lospalos.
Iha parte seluk Deputada Albina Marcal dehan, governu presiza tau atensaun ba asuntu ne’e tanba ahi ne’e importante tebes ba komunidade sira.
“Governu tenke toma responsabilidade, atu nune’e komunidade iha suku ne’e bele hetan ahi,” Deputada Marcal husu.
Nia mos husu ba komunidade sira iha suku ne’e atu pasensia oituan, hodi hein tekniku sir abele hadia fali ahi, tanba bainhira ho ansi, sei la hetan rezultadu ne’ebe diak.
Entretantu Administrador distritu Lautem, Zeverino dos Santos Sequeira, rekonese no husu ba komunidade iha suku ne’e atu kalma oituan, tanba agora dadaun governu koko hadia ona.
“Loos duni, katak iha dia 06 de Maiu akontese udan loron ida kalan ida tomak, ne’e maka rezultadu hanesan ne’e, iha tempu ne’eba airin eletrisidade barak mak monu,” Administrador ne’e konfesa.
Nia garante katak, iha semana rua oin mai tan, komunidades iha suku ne’e bele asesu ona ba eletrisidade.
