Membru Parlamentu Nasional sujere ba Ministeriu Saude atu halo intervensaun ba Pesoal Saude ne’ebe loke sira nia klinika privadu iha uma estadu nian iha distritu Lospalos, tanba governu sei uja uma ne’e ba laboratorium.
Deputada Anastacia da Costa Amaral, hateten, lei bandu atu uja uma estadu ba interese privadu, tanba ne’e Ministeriu Saude tenke resolve lalais.
“Pesoal Saude balun iha distritu Lospalos loke sira nia klinika privadu iha uma estadu nian, ne’e bazea ba ami nia fiskalizasaun e mos informasaun husi sira nia dirijente ospital Lospalos rasik hato’o mai ami,” Deputada Amaral, iha Parlamentu Nasional.
Entretantu Deputada Albina Freitas Marcal, nudar komunidade Lospalos ne’ebe mos kestiona maka’as kona ba kestaun ne’e no husu ba ministeriu kompetente atu halo interevensaun lalais.
Nia dehan, uma estadu nian mak fo ba parteira sira atu hela ba hodi hala’o servisu atendementu saude ba komunidade.
“La’os atu loke fali klinika privadu fa’an fali aimoruk ba, maibe atu hela ba,” Marçal preokupa.
Nia hatutan, komunidade sira lamenta tebes, tanba dalaruma iha oras servisu nian, sira abandona tiha pasientes, ba fali iha klinika hodi fa’an tanba klinika ne’e iha kompleksu ospital nian.
Enkuantu Prezidente Komisaun Funsaun Publiku, Liborio Pereira rekonese katak, Pesoal Saude balun hala’o pratika iha klinika privadu sira, tanba uluk laiha regime espesial maibe ba futuru ministerio saude tenke hare situasaun ida ne’e.
“Funsionariu hotu iha regras servisu, ba los estadu deit, se ba fali fatin seluk entaun lalika sai funsionariu publiku,” Prezidente KFP ne’e katak.
