Sekretaria Estadu ba Promosaun Igualidade, Idelta Maria Rodrigues, katak sira sei esforsu maka’as atu integra materia jeneru iha kurrikulum nasional iha Sentru Formasaun Publiku ne’ebe ejiste iha rai laran.
Tuir nia, importante tebes atu inkaixa materia jeneru iha sentru formasaun publika sira, hanesan sentru formasaun Instituisaun Nasional Administrasaun Publiku inklui sentru formasaun juridiku, nune’e sira mos iha konesementu klean kona ba igualidade jeneru.
“Agora dadaun SEPI esforsu maka’as hela atu integra materia jeneru ba kurikulum sira iha formasaun sira ne’ebe sei tuir mai ne’e,” Sekretaria Estadu ba Promosaun Igualidade (SEPI) Idelta Maria Rodrigues hateten, bainhira halo aprezentasaun kona ba progresu no dezafiu iha area jeneru nian, iha Sentru Konvensaun, Dili.
Nia dehan, agora dadaun laiha edukasaun formal ida mak iha kurikulum kona ba jeneru nian, ida ne’e dezafiu bo’ot ida no Ministeriu Edukasaun tenke tau atensaun.
Tanba tuir nia, iha Lei Violensia Domestika artigu 11 mensiona ona kona ba papel edukasaun nian, atu integra jeneru iha kurikular eskola nian.
Entretantu reprezentante Ministeriu Justisa, Nelinho Vital, hateten dadaun ne’e sira servisu hamutuk ona ho parseiru sira hanesan SEPI, UN Women no UNICEF atu integra materia jeneru iha kurikulum nasional sentru formasaun juridiku.
“Atu hakbi’it liu tan juis ka majestura sira nia konesementu diak kona ba direitu sira ne’e, Ministerio Justisa koko atu hatama mos direitu feto nian ba iha kurikurum nasional sentru formasaun juridika,” Vital dehan.
Iha parte seluk, Vise Ministra Edukasaun, Dulce Soares, hateten sira sei halo revizaun ba kurikulum nasional ne’ebe durante ne’e implementa ona, hare fila fali materia sira ne’ebe perspetiva jeneru, bele konsidera mos.
“Hau hanoin iha buat rua mak ita tenke halo sei servisu hamutuk ho organizasaun relevantes sira atu hatama asuntu sira hanesan ne’e iha revizaun kurikulum atu integra iha ensino hotu-hotu,” Vise Minisra Edukasaun ne’e katak.
Nia afirma, bainhira materia jeneru hatama ona iha kurikulum nasional, sei foka liu kona ba historia rezistensia liu-liu heroina sira, situasaun moris feto, atividade feto inklui mos direitu feto tanba iha materia balun mensiona konaba igualidade hanesan estudu do meu, sidadania no direitus humanus.
