Membru Parlamentu Nasional rekomenda ba Komisaun Anti Korupsaun, atu loke prosesu investigasaun ba ajensia Servisu Autonomo de Medikamentus no Equipamentus da Saude kona ba aimoruk, konsumoveis no reagentes ne’ebe Ministeriu Saude sunu iha tinan kotuk.
Membru Komisaun F (edukasaun, saude, igualidade jeneru, veteranus no kultura), Deputada Ilda da Conçeicão katak, aimoruk ne’ebe sira sunu iha tinan 2012 ne’e gasta orsamentu ne’ebe ho montante bo’ot.
“Publiku hakarak hatene tipu aimoruk, konsumoveis no reagent sira ne’ebe sunu ne’e, tanba durante ne’e fasilidade saude iha teritoriu tomak halerik ba aimoruk ikus mai aimoruk lubuk ida mak sunu,” Deputada Ilda preokupa, iha Parlamentu Nasional.
Alem de ne’e, povu mos hakarak hatene aimoruk no ekipamentus sira ne’e tanba sa mak rai to’o frazu liu enkuantu sentru saude no ospital sira kontinua halerik kona ba menus aimoruk.
“Total item ne’ebe destroy 236,ho total kustu $1,697,054.48, ne’ebe tenke investiga,” Deputada ne’e sujere.
Bazeia ba dokumentus ne’ebe TDW hetan asesu hatudu, katak total tipu aimoruk, konsumoveis, reagente ne’ebe Ministeriu Saude sunu iha loron 28 fulan Dezembru 2012 liu ba hahu husi tinan 2010 to’o 2012 hamutuk 236 items ho kustu montante $1,697,054.48.
Husi montante orsamentu ne’e mai husi fundo orsamentu geral do estadu ne’ebe aloka ba SAMES iha tinan 2010-2012 atu sosa aimoruk inklui mos konsumoveis no reagente ho montante $1,183.711.34 nune’e mos fundu Externa ne’e atu sosa mos aimoruk, konsumoveis no reagent ho montante $513,343.14.
Hatan ba kestaun ne’e Prezidente Komisaun Temporario SAMES, Odete Maria Freitas Belo katak, sira laiha kompetensia atu hadia sistema jestaun SAMES nian, nune’e labele akontese tan iha future, tanba komisaun ne’e la’os permanente.
“Ita sei iha gestor foun ba SAMES, espera katak gestor foun ne’e mak sei muda no hadia sistema SAMES nian iha futuru,” Prezidente Komisaun ne’e dehan.
Nia hatutan, nudar komisaun temporario sira nia servisu mak, asegura deit funsionamentu SAMES nian kona ba planu no politika.
