Koordenadora Program Manager organizasaun Caucus, Paula Corte Real hateten, sira laiha programa atu prepara feto potensial sira hodi partisipa iha eleisaun Xefe Sukus ne’ebe sei realize tinan 2014.
Maske laiha programa espesifiku ba sira, maibe Koordenadora ne’e optimista, katak numeru feto sei aumenta iha eleisaun lideransa komunitaria tinan oin.
“Ami fiar tanba realidade iha primeiru period husi sukus 442, sukus hitu feto mak lidera, nune’e mos iha segundu period (2009), husi feto nain hitu sae ba nain 11 mak sai Xefe Suku, signifika partisipasaun feto komesa diak ona,” Koordenadora Program Manager Caucus, Paula Corte Real,iha Mascarenhas,Dili.
La’os ne’e deit, nia dehan, iha nivel aldeias, agora dadaun iha feto nain 26 mak lidera aldeias, tanba ne’e sira garante katak feto nia partisipasaun sei diak liu tan iha eleisaun tinan oin mai.
Koordenadora ne’e hatutan, maske husi sira nia parte laiha programa treinamentu, maibe organizasaun feto balun hahu halo formasaun ba feto potensial sira hodi partisipa iha eleisaun lideransa komunitaria ne’e.
“Agora ami focus liu ba munisipiu nian,” Koordenadora Caucus ne’e katak.
Tanba ne’e nia afirma, sira nafatin buka fundus hodi suporta no enkoraja feto sira partisipa iha eleisaun sukus no munisipiu iha tinan 2014.
Iha parte seluk, Sekretaria Estadu ba Promosaun Igualidade (SEPI), Idelta Maria Rodrigues, hateten sira seidauk iha numeru targetu ba partisipasaun feto iha sukus, maibe rekonese katak partisipasaun feto hahu diak ona.
Tuir nia, importante tebes feto nia partisipasaun iha prosesu dezenvolvementu tomak, tanba ne’e SEPI sei analiza no hare lei elisaun lideransa local no munisipiu, nune’e bele fo fatin mos ba feto sira atu espresa sira nia hanoin kreativu ba prosesu dezenvolvimentu ida ne’e.
“Hau hanoin ita hakarak hasa’e numeru partisipasaun feto iha politika iha nivel nasional, distrital no rural ne’e importante tebes,” SE Rodrigues hateten.
