iretora Instituto Nacional de Dezenvolvementu de Mão de Obra (INDIMO), Isabel Fernandes de Lima hateten, sira sei la fo akreditasaun ba sentru formasaun ne’ebe fo formasaun la tuir materia no regras akreditasaun ne’ebe sira prepara.
Nia dehan, buat importante ne’ebe sentru formasaun sira tenke mantein, mak hanorin tuir materia kualifikasaun nasional ne’ebe sub-komisaun kompostu husi industria, sira identifika ona tuir nesesidade merkadu nian inklui mos fasilidades.
“Kuandu ami halo ona revizaun akreditasaun, sira ne’ebe hatudu servisu diak, ami kontinua maibe sira ne’ebe la diak ami sei la fo tan akreditasaun no la rekomenda sira hodi hetan subsidio tanba sira la kumpri kriteria akreditasaun,” Diretora INDIMO, Isabel Fernandes de Lima, iha Dili.
Nia informa, durasaun ba akreditasaun tinan tolu, no tuir planu ne’ebe iha INDIMO sei halo revizaun ba sentru formasaun 19, kompostu husi sentru formasuan publiku hanesan Senai, Tibar, CeFTeC, Akademia Polisia area investigativu, IADE espesifiku emprezaria, INAP inklui ETDA, Don Bosco no seluk tan iha tinan 2015.
Diretora ne’e rekonese katak, sentru formasaun ETDA foin hetan akreditasaun iha area administrasaun, maibe sira mos hola parte iha sentru ne’ebe forma ema ho kualidade duni, tanba iha formado barak mak komete iha merkaduria.
Setor espesifiku ne’ebe agora dadaun estabelesidu hodi forma ema, mak hospitalidade, agrikultura, konstrusaun, otomotif, edukasaun training no avaliasaun, administrasaun no finansas, ba futuru sei hare tan area espesifiku rua hanesan petroleum no maritime.
Iha parte seluk, Diretora East Timor Development Agency (ETDA), Palmira Pires, hateten nudar parseirus governu iha area kapasitasaun, sira iha komitmentu atu forma ema ho kualidade tuir kualifikasaun nasional, nune’e bele prense iha merkadu trabalhu.
Maske ho fasilidade no rekurusu humanu ne’ebe naton, nia dehan, sentru formasaun ETDA forma ona joven lubuk ida iha area espesifiku sira hanesan administrasaun no finansas, lingua no hospitalidade.
“Iha area administrasaun no finansas ami fo ona formasaun ho kualifikasaun nasional ne’ebe INDIMO hakarak tanba ami iha fasilidade no rekurusu humanu ne’ebe kualifikadu,” Diretora Pires katak.
