Komisaun Temporario Servisu Autonomo Medikamentus e Ekipamentus da Saude rekomenda ba governu, atu SAMES sai empreza publiku, nune’e bele hetan kapitalizasaun husi orsamentu kada tinan no bele fo atendementu ne’ebe diak ba publiku (distribuisaun aimoruk).
Prezidente Komisaun Temporariu Servisu Autonomo Medikamentus e Ekipamentus da Saude (SAMES), Odete Maria Freitas Belo, katak komisaun prepara ona relatorio ida kona ba servisu komisaun nian durante fulan neen, inklui mos rekomendasaun balun kona ba estatutu SAMES nian ne’ebe sei aprezenta ba iha Primeiru Ministru iha tempu badak.
Nia dehan, iha opsaun tolu mak hato’o iha rekomendasaun ne’e ba governu atu hili, kona ba estatuta SAMES, mak SAMES tenke mantein hanesan empreza publiku, sai divizaun ida iha Ministeriu Saude no tenke hetan kaputalizasaun husi orsamentu jeral do estadu.
“Bazeia ba esperiensia no informasaun ne’ebe ami hetan ho hare durante fulan neen, ami hanoin katak diak liu ita mantein SAMES hanesan empreja publiku tanba sai empreja publiku bele hetan apoiu barak mos husi doadores sira,” Prezidente Komisaun Temporariu SAMES, Belo, iha Dili.
Iha parte seluk, Membru Parlamentu Nasional, Deputada Ilda Maria da Conçeicão konkorda ho komisaun temporario katak SAMES tenke sai empreja publiku ida atu hetan kapitalizasaun husi orsamentu jeral do estadu se lae sei iha impaktu bo’ot ba servisu SAMES tanba sira lahetan kapitalizasaun.
Nia hateten Komisaun F (Saude, Edukasaun, Veteranus, and Igualidade) nafatin ejijie ba SAMES atu prepara sira nia estatutu rasik hodi aprejenta ba governu atu hetan aprovasaun tanba SAMES atu lao efetivu liu tan iha futuru tenke iha estatutu rasik nudar empreja publiku ne’ebe bele hetan kapitalizasaun se lae kada tinan hetan deit orsamentu $16,000 husi orsamentu jeral do estadu.
“Tanba atu hetan kapitalizasaun ne’e tenke iha estatutu rasik bele determina montante orsamentu jeral ba sira ne’e to’o iha ne’ebe,” Deputada ne’e apoia.
Hatan ba kestaun ne’e Ministerio Saude, Sergio da Costa Lobo hateten katak Ministerio Saude laiha konpetensia atu deside mesak opsaun ne’ebe SAMES sira rekomenda iha sira nia relatorio atu sai empreja publiku ka devisaun ida ne’e depende ba desizaun konseilho ministru.
“Sira mak tenke aprezenta relatorio iha Konselhu Ministru nune’e Konselhu Ministru mak sei deside, la’os hau mak deside,” dehan Ministru Lobo.
