Ministru Transportes no Komunikasaun, Pedro Lay hateten, sira iha ona planu atu hadia terminal tolu; terminal Becora,Tasi-tolu no terminal Taibesi.
Nia dehan, agora halo hela dezenu ba terminal tolu ne’e. “Tinan oin ami bele komesa halo ona uma iha ne’eba,” Ministru Lay dehan, iha Kaikoli, Dili.
Entretantu membru Komisaun E (infrastruturas, transportes no komunikasaun), Deputadu Paulino Monteiro Soares Babo, katak ne’e planu ne’ebe diak no importante duni.
“Tanba ita hare ba iha nasaun seluk hanesan Indonezia terminal bus iha duni, atu nune’e ita bele organiza transportes sira ne’e halai tuir nia dalan,” Deputadu Monteiro tenik.
Nia hatutan, bazeia ba realidade ne’ebe iha katak, transportes liu-liu ba bus ne’ebe halai ba distritus, agora dadadun desorganizadu, tanba lori pasajeirus sira tama to’o sidade laran, tanba terminal la funisona.
Iha sorin seluk Lucas Sarmento, pasajeiru ida husi Baucau atu mai Dili informa katak,bus la para iha terminal Becora tanba Estrada iha parte Fatuahi nian agora dadaun hadia hela.
“Ne’e la’os bus mak lakohi para iha terminal , maibe tanba ema hadia hela Estrada fatuahi nian seiduak remata,” Pasajeiru Sarmento dehan.
Nia hatutan,uluk bus parte leste ninian para hotu iha terminal, maibe tanba Estrada parte Fatuahi nian monu bebeik, entaun governu hadia tiha estrada ne’e no bis sira para hotu iha Lesidere.
