Eskola Ensino Baziku foun iha suku Funar ne’ebe harii husi Ministeriu Edukasaun servisu hamutuk ho Unicef, agora iha ameasadu (rai halai) nia laran tanba harii iha foho lolon.
Eduardo Martins, bada’en ne’ebe kaer konstrusaun uma eskola ne’e hateten, konstrusaun remata tiha ona no hein deit atu reboka mas eskola ne’e agora haliis tiha ona tanba rai halai.
“Eskola ne’e ameasa duni tanba wainhira hau mai servisu, eskola sorin haliis tiha ona, rai nakfera kedas ona,” Bada’en Martins dehan, iha suku Funar, Laclubar.
Nia konta, uluk bada’en seluk mak halo eskola ne’e, mas halo la hotu bada’en para tiha entaun kompania halo kontratu foun ho nia ho $500,00 hodi reboka to’o hotu eskola ne’e.
Tanba ne’e nia sujere, tenke halo lutu no kuda ai haleu tiha eskola, nune’e bele proteze eskola ne’e no labele monu.
Entretantu reprezentante Unicef, Antonio Gomes hateten, rai ne’e oferese husi Xefe Suku no komunidade suku Funar, sira mak hatudu rai ne’e katak halo eskola iha ne’eba.
“Ameasa rai halai tanba harii kedas iha laletek oan nia leten, ne’ebe mak sor-sorin rai naruk, e agora uma mos tun ona, ne’e perigozu, tenke halo moru no kuda aihoris sira,” reprezentante Unicef, Gomes katak.
Enkuantu total orsamentu ba obra ne’e hamutuk $30,000 resin, no kompania local mak kaer projetu konstrusaun.
Nia dehan, eskola ne’e ameasa rai halai tanba Xefe Suku komunidade sira iha fatin ne’eba la tetuho didiak antes entrega hodi halo eskola.
Nia hatutan, eskola foun ne’e iha sala hamutuk tolu, no kompleta kedas ho dapur no sintina.
Hatan ba problema ne’e Xefe Suku Funar,Francisco Soares katak, harii eskola foun ne’e iha linha koordenasun ho autoridade edukasaun no kompaiha sira, tur hamutuk halo reuniaun mak desid hodi estabelese iha eskola fatin ne’eba.
“Problema ami nia kondisaun rai mak hanesan ne’e ona, mais iha momentu ne’eba hau hateten,bainhira harii eskola iha ne’eba la seguru ba labarik sira tanba anin,” Xefe Suku Funar ne’e katak.
Tuir nia, atu harii iha fatin ne’ebe mak tetuk presiza orsamentu ne’ebe bo’ot, aluga tan trator mak foin bele dudu tan rai tanba rai ne’e nia kondisaun laletek.
“Husi komunidade sira mai hateten dehan,fatin sentru tetuk mak ida ne’e ona,” Xefe Suku ne’e tenik.
Tanba ne’e nia hatutan, asuntu ne’e sei hato’o ba estudante sira nia inan aman, atu lori ai oan hodi kuda iha fatin ne’ebe mak ameasa rai halai.
