Vise Prezidente Komite 12 Novembru, Rogerio Castro da Cruz dehan, planu atu harii monument 12 Novembru ne’ebe governu planeia desde tinan 2010, to’o agora seidauk realize.
Tuir nia, planu ida ne’e to’o agora seidauk iha solusaun maske eis Xefe Estadu, Jose Ramos Horta lansa ona primeira pedra iha tinan kotuk iha semiteriu Santa Cruz no hela ba planu deit.
“Ami fo ona proposta,governu mak tenke desidi,bainhira-bainhira ne’e planu governu nian,” Vise Prezidente Komisaun 12 Novembru, da Cruz, iha Balide,Dili.
Maske nune’e nia hatutan, sira nafatin ejiji ba governu hodi realize planu ne’ebe iha ona, tanba vitima 12 Novembru sira mate ba rai ida ne’e.
Iha sorin seluk Prezidente Komisaun E (infra-estruturas,transporte no komunikasaun), Deputadu Pedro das Martires da Costa, katak orsamentu atu halo monument 12 Novembru nian iha Santa Cruz ne’e mak agora governu uja halo tiha monument iha igreja Motael nia oin.
“Monumentu ne’e parese autores 12 de Novembru nian maibe sira la konkorda no sira hakarak monumentu ida atu simboliza aktu 12 de Novembru ne’e,” Prezidente Komisaun E ne’e dehan.
Nia dehan, se atu harii tan monument ida iha Santa Cruz, tenke tau fali orsamentu foun tanba orsamentu ne’ebe iha utilize tiha ona.
Entretantu sobrevivente 12 Novembru no atual Deputada Maria Angelica Rangel hateten, iha 2010 orsamentu preve tiha ona atu halo monumentu iha Santa Cruz maibe to’o agora e realiza.
“Hau nudar sobrevivente ba 12 de Novembru, hau aseita atu halo monumentu historiku ruma, atu ita nia jerasaun foun mai bele hare hodi relembra katak,uluk joven sira nia kontribuisaun ba nasaun halo oinsa,” Deputada Rangel dehan.
Kona ba estatua ema ne’ebe governu halo tiha ona iha igreja Motael nia oin ne’ebe reprezenta ona monument ba vitima 12 Novembru, nia hatutan, la’os halo estatua maibe monument.
“Nudar sobrevivente hau triste,” Deputada ne’e triste.
