Xefe Suku Rasa, distritu Lautem, Jaoquin Sarmento husu ba governu atu toma responsabilidade ba programa merenda eskolar iha eskola Ensino Baziku Rasa ne’ebe to’o agora seidauk la’o.
Nia dehan, fulan tolu ona merenda eskolar iha eskola sentral suku rasa paradu to’o agora.
“Orsamentu ba merenda eskolar nian mos to’o agora seidauk foti, ne’e hanusa mak ne’e,” Xefe Suku Sarmento preokupa, iha Lospalos.
Tanba ne’e nia husu ba governu, atu toma atensaun ba problema ne’e, tanba esperiensia iha tinan kotuk, merenda eskolar iha eskola ne’e paradu durante fulan neen nia laran.
“Oinsa mak bele kria sistema ne’ebe diak, atu nune’e merenda eskolar ne’e labele mate- moris,” Xefe Suku Rasa ne’e sujere.
Entretantu Deputada Aurelio Freitas Ribeiro hateten, preokupasaun hirak ne’e sira hato’o bebeik ona ba ministeriu relevante, maibe realidade mak hanesan ne’e.
“Resposta husi governu maka sei hadia, sei halo planeamentu, la hatene to’o bainhira, maibe ami nudar membru parlamentu, ami sei hakilar nafatin to’o iha rezultadu,” Deputadu Ribeiro promete.
Deputadu ne’e esperansa katak, ministeriu relevante bele resolve problema ne’e iha tempu badak, nune’e estudante sir abele asesu fali ba merenda eskolar.
Iha fatin hanesan Administrador distritu Lautem, Zeverino dos Santos Sequeira, hateten nia parte hato’o ona kestaun ne’e ba iha ministeriu edukasaun maibe prosesu mak nune’e duni.
“La’os ita mak dehan lakohi atu ezekuta, la’e maibe tanba ezekusaun orsamentu mak tarde e nia prosesu mak nune’e,” Administrador Sequeira tenik.
Tanba ne’e nia husu ba estudante sira atu augenta oituan,karik fulan oin mai merenda eskolar bele la’o hikas.
