Tribunál Distritál Dili kondena kondenadu Rigoberto Monteiro, ho pena tinan rua fulan neen ne’ebe tribunal suspende ba tinan tolu tanba involve iha korupsaun.
Alem de ne’e,Tribunál Distrital Dili (TDD) mós haruka kondenadu selu indeminazasaun ba estadu ho montante $30,000,00 no $20,00 ba selu kustu judisiál.
Arguidu Monteiro ne’ebe servisu nudar Sekretariu Jeral Konfederasaun Sindikatu Trabalhador Timor-Leste (SekJer-KSTL),sai kondenadu tanba tribunal prova katak,kondenadu utiliza osan $30,000,00 ne’ebe Sekretáriu Estadu Politika Formasaun Profeisonal no Empregu (SEPFOPE) manda ba konta bankaria KSTL nian, ba nia nesesidade privadu.
Diretor Ezekutivu Judicial System Monitoring Program (JSMP), Luis de Oliveira Sampaio katak, pena ne’e adekuadu duni ba sala ne’ebe nia halo, nune’e ba oin labele uja sala (salah menggunakan) osan estadu nian sein iha konesementu husi parte kompetente.
“Ne’e hanesan lisaun importante ida ba sidadaun hot-hotu, tanba kualker aktu sira ne’ebé involve abuzu konfiansa ka abuzu poder, sei hatan no responsabiliza iha tribunál tuir kualidade aktu ne’ebé kometidu,” Diretor Sampaio dehan.
Entretantu Ministériu Públiku iha nia akuzasaun haktuir katak, SEPFOPE haruka osan ba KSTL,relasiona ho akordu programa formasaun profesional nian, maibe momentu halo tranferensia SEPFOPE halo erru tanba halo tranferensia dalarua, primeiru $30,000,00 no segundu mos hanesan.
Kondenadu uja nia poder nudar SekJer KSTL, deside halo levantamentu ba osan ne’ebé la’ós partensia ba KSTL nian. Nia orienta osan $30,000,00 (tranferensia segundu), utilija hodi haruka staff ba tuir konferensia internasionál iha Jakarta-Indonezia, inklui ba perdiem ne’ebe laiha konesementu husi Prezidente KSTL nian.
Alem de ne’e, arguidu mos uja osan ne’e balun ba nia nesesidade privadu. Iha julgamentu antes ne’e, arguidu deklara ba tribunál katak arguidu fó fila osan ne’ebé nia utiliza sala ba nia interese privadu.
Iha parte seluk, tuir Deputadu Arao Noe katak, ne’e kestaun ne’ebe grave tebes no pena ne’ebe tribunal foti ne’e adekuadu duni.
“Presiza toma atensaun, tanba osan ne’ebe maka fo ba ne’e nudar osan estadu nian, maibe utuliza la tuir nia dalan, ne’e ladun diak,” Deputadu Noe katak.
