Membru Parlamentu Nasionalsujere ba Ministeriu Transporte no Komunikasaun atu hadia lalais lampu sinais tranzitu iha capital Dili ne’ebe kontinua la funsiona.
Deputadu Paulino Monteiro Soares hateten, ida ne’e fo oportunidade bele akontese asidente trafiku.
“Ami ejiji dala barak ona oinsa mak atu hare ba lala’ok transportes nian, liu-liu kona ba sinais tranzitu sira ne’e,” Deputadu Monteiro dehan, iha parlamentu Nasional.
Nia dehan, orsamentu jeral do estadu 2013 ne’ebe Parlamentu Nasional aprova ba Ministeriu Transporte no Komunikasaun, iha mos orsamentu ba ida ne’e nian.
Entretantu komunidade Abrao Gusmao, katak durante ne’e asidente trafiku akontese bebeik tanba lampu la funsiona.
“Agora ita hare lampu sira ne’e iha fatin hotu-hotu la funsiona, kareta no motor sira mos halai arbiru deit,” Gusmao komenta.
Nudar komunidade ne’ebe hela iha capital Dili no ne’ebe bai-bain la’o, husu ba governu atu hadia tiha sinais sira, nune’e bele minimize asidente trafiku.
Hatan ba preokupasaun ne’e Ministru Transportes no Komunikasaun, Pedro Lay katak, ministeriu halo ona tenderizasaun ba problema ne’e.
“Ami asina kontratu tiha ona ho kompania Sangos Timor oan nian no agora ami haruka ona ba iha Tribunal de Kontas atu hare, tanba ita hatene katak projetu ne’ebe mak liu husi $ 15,000, tenke hetan aprovasaun husi Tribunal de Kontas,” Ministru Lay katak.
Nia dehan, hafoin aprova husi Tribunal de Kontas, foin bele hala’o servisu monta sinais foun. No nia rekonese katak lampu sinais tranzitu iha Dili laran kuaze ke at hotu ona.
