Komunidade suku Funar, sub-distritu Laclubar,distritu Manatuto husu ba governu atu hadia sira nia estrada, atu nune’e bele lori sira nia produtu lokal hodi ba fa’an iha merkadu.
Eduardo Martins, komunidade Laclubar hateten, komunidade suku Funar iha produtu local barak mak atu lori ba fa’an maibe Estrada mak ladiak.
“Kuandu udan bo’ot kareta la mai, tanba ne’e foho la’os Laclubar,” komunidade Martins dehan, iha Funar, Laclubar.
Nia dehan, dalaruma sira prepara tiha sira nia produtu local hanesan kafe, bani been no aifarina, atu ba fa’an iha merkadu iha Laclubar, maibe kareta la mai tanba estrada at.
“Merkadu iha suku Funar laiha, atu fa’an karik tenke lori ba iha Laclubar,” katak komunidade ne’e.
Preokupasaun hanesan hato’o mos husi komunidade Jose Alves, katak sira iha produtu lokal barak maibe kareta laiha atu tula tanba estrada la premite.
“Tempu bailoro kareta sira tama, maibe kuandu udan ona kareta sira labele tama,” dehan Alves.
Tanba ne’e nia husu ba governu atu hadia sira nia estrada ne’e, nune’e sir abele asesu ba merkadu hodi sira nia produtu ne’ebe iha.
Iha fatin hanesan , Xefe Suku Funar, Francisco Soares hateten, sira la ejiji buat seluk maibe importante mak estrada tenke diak.
“Ami la husu buat barak, maibe estrada tenke diak nune’e komunidade sir abele lori sira nia produtu ba fa’an iha merkadu iha Laclubar,” Xefe Suku ne’e dehan.
Hatan ba preokupasaun ne’e,Administrador sub-distritu Laclubar, Agripino da Silva Costa rekonese katak estrada iha parte ne’e at duni.
“Ita labele bosok dehan ita halo ona buat barak, estrada at duni,” Administrador Soares rekonese.
Nia rekonese katak, estrada diresaun distritu Manatuto mai iha Laclubar ne’ebe rehabilita husi Ministeriu Obras Publiku,liu-liu iha suku Kribas atu at tiha fali tanba laiha kualidade.
“Rehabilita la to’o mai iha Laclubar tanba orsamentu la to’o, e Estrada ne’e fulan tolu deit kuak fali,” Administrador ne’e kritika.
