Komunidade Suku Funar ,sub-distritu Laclubar husu ba governu atu dada eletrisidade ba sira, hodi nune’e sira asesu ba informasaun tanba durante ne’e komunidade sira hela deit iha nakukun.
Jose de Jesus, Komunidade Suku Funar ne’e hateten ,durante ne’e sira uja deit solar panel maibe nia kapasidade nato’on deit.
“Ami iha ne’e balun mak uja ona solar panel maibe balun seidauk uja, tanba ne’e ami hakarak husu ba governu, se bele karik dada eletrisidade ba ami atu nune’e ami bele asesu hotu,” komunidade de Jesus ejiji, iha Manatuto.
Tuir nia, suku ne’ebe durante ne’e izoladu liu iha sub-distritu Laclubar, distritu Manatuto no nunka asesu ba dezenvolvementu mak suku Funar.
“Ami suku ida ne’e desde Indonezia nia tempu to’o mai ita ukun an, ami seidauk asesu ba eletrisidade,” de Jesus dehan.
Preokuasaun hanesan hato’o mos husi kmunidade seluk, Jose Alves, katak dezenvolvementu ne’ebe durante ne’e la’o seidauk masimu, tanba komuniddae iha area rural seidauk asesu ba buat ne’ebe sai nesesidade baziku.
“Ami husu ba governu atu dada ahi ba ami, atu nune’e ami suku ida ne’e bele asesu ba informasaun,” ejiji Alves.
Entretantu Xefe Suku Funar, Francisco Soares rekonese katak,komunidade Suku Funar defisil atu asesu informasaun tanba ahi laiha.
“Bainhira problema ruma akontese iha sidade Dili, ami atu akompanha notisia kona ba ida ne’e liu husi televizaun ka radio mos, ahi laiha, ami iha televizaun no parabola,” tenik Xefe Suku ne’e.
Tanba ne’e, nia husu ba governu atu halo manutensaun ba solar panel ne’ebe mak governu fo ba sira nia suku tanba agora at tiha ona.
