Komunidade Suku Funar, sub-distritu Laclubar, distritu Manatuto desde uluk to’o agora ladauk hetan asesu ba bee moos, tanba ne’e sira ejiji ba governu atu kanaliza bee moos ba sira.
Jose de Jesus, nudar komunidade iha suku ne’eba, sente preokupadu tanba durante ne’e sira kuru bee iha mota no fatuk kuak sira ne’ebe ho distansia do’ok husi hela fatin.
“Ami Suku Funar defisil atu hetan bee, tanba durante ne’e ami kuru bee iha mota laran ne’ebe la’o do’ok teb-tebes,” Komunidade de Jesus preokupa, iha Funar, Manatuto.
Iha fatin hanesan, Eduardo Martins ,komunidade Laclubar ne’ebe hala’o servisu konstrusaun iha suku ne’eba, rekonese katak, komuidade iha suku ne’e araska no konsumu deit bee mota.
“Hau la’os asli Funar, hau ema Laclubar, hau halo servisu konstrusaun iha ne’e,maibe durante iha ne’e hau nunka haris tanba bee laiha,” tenik komunidade Laclubar ne’e.
Tanba laiha bee, nia dehan, kada loron Sabado nia tenke fila ba Laclubar nune’e bele hariis no fase roupa.
Kuandu tempu udan komunidade sira aproveita udan been hodi jab a tein, fase no hariis maibe bainhira tempu bailoro, sira desaraska.
“Tanba ne’e ami husu ba governu dada netik bee ba ami tanba ami ne’e mak araska duni ba bee moos,” komunidade ne’e ejiji.
Entretantu Administrador sub-distritu Laclubar,Agripino da Silva S.Costa konfesa katak, komunidade Funar araska duni ba bee moos, tanba ne’e nia sei fo prioridade uluk ba bee moos.
“Hau mai fou-foun, bee susar la halimar,ita tesik ba Rulalan sira ne’e mai to’o Fatulaun, tesik mai Orlalan sira ne’e susar teb-tebes atu asesu ba bee mos,” Administrador Costa katak.
Dadaun ne’e, nia informa katak, administrasaun sub-distritu hamutuk NGO Aplimentec konsege dada ona bee moos ba komunidade sira iha suku Sananain no komunidade kuaze 80 to’o90% mak asesu ona ba bee moos.
“Agora Suku Orlalan hela deit aldeia ida naran Pualaka deit tanba komunidade sira mak la iha konsiensia atu fo bee ba ita nia maluk sira tanba sulan tiha hena at sira ne’e iha kanu,” tenik Administrador ne’e.
Tuir planu, tinan ne’e planu atu hatama PDID atu komunidade sira hotu bele asesu ba bee moos.
