Komunidade suku Funar, sub-distritu Laclubar,distritu Manatuto, tinan ne’e ameasadu hamlaha tanba animal fuik estraga hotu sira nia aihan iha to’os laran.
Xefe Suku Funar, Francisco Soares katak, komunidade sei hasouru hamlaha iha tinan ida ne’e tanba sira nia aihan hanesan batar, aifarina no aifuan sira seluk estraga hotu husi animal fuik.
“Sira nia to’os animal fuik hanesan laho, manu no manu fuik sira estraga hotu,” Xefe Suku Soares, dehan, iha Laclubar,Manatuto.
Iha fulan rua ba kotuk, nia dehan, nia hato’o ona proposta ba iha Ministeriu Solidariedade Sosial (MSS), maibe MSS rejeita no konsidera proposta ne’e la klaru tanba laiha filmajen ba aihan ne’ebe mak animal fuik sira han.
“Hau sente susar oituan tanba ida ne’e la’os buat maos ida, ne’e animal fuik e sira estraga aihan iha tempu kalan,” Xefe Soares katak.
“Ne’ebe ami hasai deit foto batar ne’ebe laho han , nia sinal-sinal ne’e mak ami hasai ba hatama fali iha ne’eba maibe to’o agora seidauk resposta ba ami nia proposta ne’e,” Xefe Suku Funar dehan.
Iha fatin hanesan Jose Alves, nudar to’os nain iha suku refere reforsa katak,tinan ne’e sira susar tebes-tebes ba hahan tanba sira nia to’os animal fuik estraga hotu.
“Agora ami aproveita deit bani been no talas balun ne’ebe mak animal la han ne’e, mak ami konsumu,” dehan to’os nain ne’e.
