Klinika Marie Stops Internasional hili Sentru Joventude Comoro sai fatin koalia amizavel ho foinsa’e sira, hodi sira bele asesu ba informasaun kona ba edukasaun seksual no seluk tan.
Marketing Manager Marie Stops Internasional Timor-Leste (MSITL), Marianne Kearney hateten, ohin loron foinsa’e barak mak hetan isin rua sedu tanba falta informasaun kona ba edukasaun seksual.
“Ami hakarak estabelese fatin ne’e atu enkoraja foinsa’e sira no desimina informasaun ba foinsa’e sira kona ba saude nian no oinsa atu hala’o domin ne’ebe diak hodi evita isin rua sedu, bainhira seidauk preparadu,” Marketing Manager MSITL, Kearney, iha Comoro, Dili.
Alem de ne’e, nia dehan, MSITL mos fo ona treinamentu konseling ba foinsa’e balun iha Sentru Joventude Comoro, enkoraja no desimina informasaun no sai sira nia belun diak, hodi rezolve problema ne’ebe sira hasoru.
Entretantu Reprezentante Timor Telekom, Catarina O. Montellano katak, atu atrai foinsa’e sira vizita sentru ne’e, MSITL hamutuk ho TT loke konkursu dezenu ba foinsa’e grupu lima hodi dezenu sentru ne’e sai furak liu ho mensajen balun inklui mos oferese linha internet no Hot line (Tlp 8001001) gratuita atu foinsa’e sira bele uza hodi asesu informasaun ruma konaba saude foinsa’e nian.
Nia hatutan, sentru ne’e importante tebes ba foinsa’e sira atu asesu informasaun sira, hanesan edukasaun seksual inklui mos problema seluk ne’ebe foinsa’e sira hasoru.
“Ami espera katak foinsa’e sira iha ne’e bele hetan benefisiu husi apoiu sira ne’ebe ami fo iha futuru,” Montellano esperansa.
Iha parte seluk, foinsa’e Domingos Ribeiro ne’ebe sai vensedor iha kompetisaun dezenu ne’e, kontente ho rezultadu dezenu ne’ebe nia grupu halo ho mensagen furak ne’ebe iha, atrai duni kolega foinsa’e sira atu vizita sentru ne’e.
“Ami hanesan joventude fatin ida ne’e importante tebes ba ami atu halibur iha ne’e hodi hetan informasaun ruma ne’ebe bele benefisia ba ami iha futuru,” tenik Ribeiro.
