Xefe Sentru Saude Laclubar, Almerinda da C.Pereira hateten, Servisu Autonomo Medikamentus de Ekipamentus da Saude haruka aimoruk ba sira nia sentru saude la tuir pedidu ne’ebe iha maibe haruka aimoruk ne’ebe liu ona prazu.
Xefe Sentru Saude ne’e dehan, durante ne’e bainhira sira rekomeda aimoruk ba Servisu Autonomo Medikamentus de Ekipamentus da Saude (SAMES), sira sempre fo aimoruk ne’ebe liu ona prazu.
“Dalaruma expire tiha ona mak haruka mai,ou hela fulan ida atu expire mak haruka mai,” Xefe Sentru Saude ne’e preokupa.
Preokupasaun hanesan haforsa husi Staf Administrasaun Logistika SSL, Manuel Soares Quintao sublina katak,SAMES haruka aimoruk la tuir nesesidades ne’ebe sentru saude ne’e rekomenda ba.
“Sira la fo aimoruk tuir saida mak ami iha nia pedidu, fo mak sel-seluk, hela fulan ida atu expire mak haruka mai ami,” preokupa Staf Administrasuan ne’e.
Tanba ne’e nia husu ba SAMES atu haruka fali aimoruk tuir sira nia pedidu, nune’e sira bele fo atendementu ba pasiente sira.
“Tanba orsamentu ne’ebe sosa aimoruk ne’e, ami husi distritu Manatuto nia osan,” katak Staf Administrasaun ne’e.
Iha fatin hanesan Farmasista iha SSL, Engracia Carceres Carvalho katak, aimoruk hirak ne’ebe presiza iha SSL mak hanesan analgesic ,antibiotic , vitamina ,amoxilin,paracetamol no prometazin.
“Agora SAMES haruka fali aimoruk calbar,asiclobin,metrodezol,infus no seluk tan, ne’ebe aimoruk ne’e ami haruka fali ba distritu e distritu haruka fali ba SAMES.
“Tanba aimoruk hirakne’e ami la presiza, ami husu aimoruk iha fulan Marsu no Abril, maibe aimoruk mai iha fulan Maiu nia laran,depois aimoruk ne’e la tuir nesesidade ne’ebe iha,” preokupa Famasista ne’e.
Tuir nia, lolos aimoruk iha semana tolu deit bele tama mai ona maibe foin dadauk ami telephone ba sira, depois dehan aimoruk iha ona maibe kareta atu lori mai mak laiha.
