Eskola Ensino Baziku Debur –Butir Funar, iha sub-distritu Laclubar, distritu Manatuto to’o agora laiha sintina e situasuan ida ne’e afeta maka’as ba labarik sira hodi tuir prosesu aprendizajen iha eskola.
Diretor da Eskola Debur Butir, Nuno da Costa Almeida hateten, durante ne’e estudante sira bainhira kabun moras, sira tenke fila ba uma no lakon materia ida.
“Ita hare alunus sira ne’e nia hela fatin do’ok husi eskola hotu, kuaze kilometru tolu, kuandu sira kabun moras sira la mai tan ona,” preokupa Diretor da Eskola, Almeida, iha suku Funar, Laclkubar.
Enkuantu estudante Miquelina do Espirito Santo, ne’ebe hela do’ok husi eskola (hela iha Bematak), hateten, sira nia eskola durante ne’e laiha bee moos no sanitasaun.
“Ami nia bee moos mos laiha, sintina mos ladiak hotu,” dehan Espirito Santo.
Tanba ne’e nia husu ba governu atu dada bee moos ba sira nia eskola, nune’e bainhira sira kabun moras ruma la presiza halai ba uma no lakon materia.
Iha fatin hanesan, Profesor voluntariu, Pedro do Santos, dehan durante ne’e sira nunka asesu ba bee moos no sintina.
“Iha sintina duni, maibe la asesu ba bee, agora dadauk sintina mos foer hela, ida ne’e fo perigu tebes ba profesor no alunus sira nia saude,” lamenta Professor do Santos.
