Xefe Sentru Saude Laclubar , Almerinda da C.Perreira informa katak, kamas ba pasientes iha Sentru Saude ne’e dadaun ne’e laiha kondisaun no at hotu ona.
Nia dehan, kamas hirak ne’e agora uja deit triplex, nune’e pasiente sira bele uja toba bainhira baixa iha Sentru Saude Laclubar (SSL).
“Kama sira ne’e tau fali triplex mihis, ne’ebe ita sae ba tarutu dadaun ona, dala ida hau tur iha kama ne’e no kama monu tun kedas ba rai,” Xefe Sentru Saude Laclubar, Almerinda da C.Perreira, iha Laclubar, distritu Manatuto.
Nia rekonese katak, sira nia sentru saude hetan duni apoia kamas husi Ministeriu Saude iha fulan Fevereiru liu ba, maibe ladauk uja tanba kamas ne’e monta ladiak.
“Tekniku husi nasional mak atu mai monta maibe to’o oras ne’e seidauk mai monta,” Xefe Perreira tenik.
Iha fatin hanesan Engracia Carceres Carvalho, Pesoal Saude iha SSL ne’e dehan, kamas ne’ebe haruka husi ministeriu mai ne’e foun duni maibe labele uja tanba monta la diak.
“Sira lori mai, ami monta tun-sae la diak tanba ne’e ami rai hamutuk deit hanesan ne’e,” dehan Pesoal Saude ne’e.
Entretantu tuir observasaun TDW iha terenu nota katak, kamas foun hirak ne’e agora dadaun tau hamutuk iha salas pasiente nian iha sentru saude ne’e.
