Xefe Departamentu Saude distritu Same, Germano Pinto hateten, sira labele halo vaksin aimoruk tanba gas laiha. Nia dehan, fulan neen ona, parte Sentru Saude Same (SSS) laiha stok gas hodi halo vaksin aimoruk.
“Uja gas mak it abele tein fo labarik sira ne’ebe moras iha sentru saude ne’e, inklui mos halo vaksin aimoruk iha fatin ne’ebe malirin,” informa Xefe Departementu Saude, Pinto, iha Same.
Nia hatutan, sira uja deit gas tanba ahi iha Same lakan mate deit, entaun ministeriu foti desizaun hodi uja deit gas, maibe agora fulna neen ona gas hotu.
“Agora Ministeriu Saude mai investiga fo sala fali ba distritu ho Sentru Saude sira,” dehan Xefe Departementu ne’e.
Alem de ne’e Deputadu Leonel Marcal hateten, sira sei hato’o asuntu ne’e ba iha Ministeriu Saude oinsa mak sir abele hadia sistema ne’ebe iha.
“Hau hanoin, ministeriu tenke hare didiak tanba ida ne’e fo impkatu ba iha ita nia pasiente sira ne’ebe baixa iha sentru saude ne’e,” dehan Deputadu Marcal.
Deputadu ne’e hatutan, problema iha setor saude barak mak seidauk bele resolve, hanesan kona ba ambulansia, kombustivel inklui gas.
Entretantu hatan ba kestaun ne’e, Ministru Saude, Sergio Lobo katak, agora dadaun ministeriu hala’o hela prosesu tenderizasaun ba kompania ida, atu distribui oksigeniu ba iha fasilidade saude sira hotu iha teritorio.
Ministru rekonese katak, durante ne’e sira iha problema barak iha setor saude nian,liu-liu kona ba distribuisaun aimoruk, oksigeniu inklui gas e ministeriu sei esforsu an.
“Ami halo hela prosesu tenderizasaun atu hetan kompania foun ida hodi bele halo distribuisaun oksigeniu ba iha fasilidade saude, tanba oksigeniu ne’e so iha Dili deit,” dehan Ministru Lobo.
