Xefe Sentru Saude Laclubar, Almerinda da C.Perreira hateten, eletrisidade iha sira nia sentru saude ladun funsiona ho diak no sempre lakan mate.
Nia dehan, solar panel iha sentru saude ne’e iha maibe la funsiona tanba baterai avaria tiha.
“Uluk sira monta buat kabuar oan ida iha didin lolon sira ne’e, monta baterai e buat ne’e la’o diak, maibe agora la funsiona,” preokupa Xefe Sentru Saude, Perreira, foin lalais, iha Laclubar, Distritu Manatuto.
Nia hatutan, solar panel ne’e to’o agora seidauk hadia, no eletrisidade loron ida mate dala rua ka to’o tolu hanesan, inklui mos tempu kalan.
“Fo impaktu teb-tebes ba pasiente sira ne’ebe baixa, sira tenke sunu lilin e balun ne’ebe emergensia hanesan inan isin rua sira atu mai partus, balun komplikadu tebes, entaun ne’e araska tebes,” Xefe Sentru Saude ne’e katak.
Entretantu Komunidade Laclubar Joao da Costa, katak eletrisidade iha Laclubar durante ne’e lakan mate hela deit.
“Ahi iha sub-distritu Laclubar mate duni, mas la’os mate lor-loron maibe mate semana ida dalaruma dala rua ou dala tolu hanesan ne’e, depois lakan fali,”da Costa katak.
Hatan ba preokupasaun ne’e Administrador Sub-distritu Laclubar,Agripino da Silva S.Costa katak,eletrisidade iha subdistritu Laculubar lakan 24 horas maibe dalaruma mos mate .
“Mate dalaruma atu kontaktu ba China sira ne’e ita la hatene sira nia lian nebe ahi kunadu mate hau sempre kontaktu ba Diretor EDTL distritu Manatuto,Senhor Canizio deit,”Admistrador Costa hato’o.
