Sosiedade Sivil liu husi Rede Monitorizasaun Dezenvolvementu distritu Manufahi preokupa tebes ho mini merkadu iha Lesuata, distritu Manufahi tanba governu husik abandona merkadu ne’e.
Reprezentante Rede Monitorizasaun Dezenvolvementu distritu Manufahi, Armando da Silva hateten, mini merkadu ne’e remata konstrusaun desde 2009, maibe komunidade sira la uja to’o agora.
“Komunidade sira la uja hodi fa’an sasan,” preokupa Reprezentante Rede Monitorizasaun Dezenvolvementu, da Silva, iha Same, distritu Manufahi.
Nia informa, konstrusaun mini merkadu ne’e tama iha projetu Pakote Referendum (PR), iha kedas tinan 2009 nian.
Preokupasoens hanesan hato’o mos husi komunidade Same, Antonio Sarmento no husu ba Ministeriu Ekonomia e Dezenvolvementu (MED) atu responsabiliza ba obra ne’e.
“Sira tenke tun mai hare direitamente merkadu ne’e, la’os husik deit nune’e hodi estraga osan estadu nian,” Sarmento preokupa.
Entretantu hatan ba preokupasun ne’e, Administrador Interino distritu Manufahi, Adao Mendes rekonese katak mini merkadu ne’e abandona hela.
“Problema tanba fatin ne’e do’ok husi komunidade sira nia hela fatin,” Administrador Mendes hato’o.
Nia dehan, fatin ba halo mini merkadu ne’e, uluk Xefe Suku sira mak propoin, maibe ikus mai komuniddae sira la uja tanba do’ok.”agora ita nia ema sira fa’an iha leten oituan, besik igreja ninian,” Administrador Mendes dehan.
Nia hato’o katak, total orsamentu ba obra ne’e hamutuk $32,000 no kompania ne’ebe kaer projetu ne’e emprezariu Same oan duni.
