Komunidade Susumera, Suku Tutuluru, Distritu Manufahi ameasas, sei la fiar tan Membru Parlamentu Nasional sira, bainhira sira nia ezijensia kona ba atu tau solar panel iha sira nia suku, laiha rezultadu.
Xefe Aldeia Susumera, Suku Tutuluru, Antonio Perreira hateten, sira nia suku izoladu liu no durante ne’e sira nia aldeia nunka hetan apoia husi governu, liu-liu kona ba solar panel nian e komunidade hela deit iha nakukun bainhira kalan.
“Labarik eskola oan sira sempre hateten mai ami, kasihan, ami araska tebes estuda ho lampu,” informa Xefe Aldeia Perreia, bainhira partisipa workshop kona ba ‘rona povu nian lian’ ne’ebe membru PN nain hat mak sai orador iha eventu ne’e, iha Manufahi.
Nia hatutan, sira (Xefe Suku no Xefe Aldeia) halo no hato’o ona proposta ba governu maibe to’o agora laiha resposta.
“Listrik seidauk tama mos laiha buat ida, maibe tenaga surya, hau husu se bele karik, tenke fo duni ba labarik eskola oan sira ne’e,” Xefe Aldeia Pereira husu.
Tanba ne’e nia husu ba Membru Parlamentu Nasional nain hat ne’e, atu eziji ba governu hodi bele oferese solar panel iha sira nia bairo laran.
“Hau hein, karik ida ne’e mak imi la organiza,hau nudar Xefe Aldeia, hau la fiar tan ona,” katak Xefe Aldeia ne’e.
Entretantu Deputadu husi bankada Partidu Demokratika (PD), Paulino Monteiro ne’ebe sai orador iha workshop ne’e katak, ahi bele tama ona to’o iha suku no aldeia tanba sub estasaun eletrisidade iha Same inagura tiha ona.
“Tanba programa governu nian katak, molok tama to’o tinan 2017, ahi tenke tama to’o aldeia hotu,” dehan Deputadu Monteiro.
Tanba ne’e nia husu ba komunidade sira iha suku Tutuluru atu kalma, hodi hein ahi sei tama to’o iha aldeia hotu inklui Tutuluru.
Enkuantu Deputadu husi bankada Fretilin,Leonel Marcal dehan, knar deputadu nian mak aprova orsamentu, halo lei no halo fiskalizasaun, la’os jestor.
“Tanba ne’e ami la iha kbi’it ida atu bele fo resposta direitamente ou bele garante, katak problema ne’e bele rezolve,” Deputadu Marcal dehan.
Maske nune’e nia hatutan, Parlamentu Nasional liu husi Sekretariu Estadu Asuntu Parlamentares sei enkamina asuntu ne’e ba iha ministeriu kompetente hodi foti solusaun.
“Ami hein semana ida, ministeriu kompetente tenke respostas,” tenik Deputadu ne’e.
