Projetu uma lima kada aldeia ne’ebe governu estabelese ba ema vulneravel sira iha distritu hotu, distritu Manufahi nian husik abandona deit.
Reprezentante Sentru Joventude distritu Manufahi, Antonio Sarmento hateten, uma lima ne’e halo desde tinan rua liu ba, maibe ema la hela.
“Uma lima ne’e agora sai tiha hanesan fatuk, ema la uja,” preokupa reprezentante Joventude distritu Manufahi ne’e, iha Manufahi.
La’os ne’e deit , obra seluk hanesan armajen hafoin konstrusaun remata , husi abandona no la uja.
“Uma Milenium Development Goal estabelese duni maibe uma hanesan kobi house entaun kobi house ne’e at lixu ne’e ita atu soe ba iha nebe,” preokupa Rede Monitorizasaun Dezenvolvementu Distritu Manufahi, Armando da Silva.
Hatan ba preokupasaun ne’e, Administrador Interino Distritu Manufahi, Adao Mendes katak, uma Millenium Development Goals (MDG) ne’ebe lokaliza iha Betano ne’e entrega tiha ona ba komunidade sira.
“So ke asrama polisia nian mak seidauk uja to’o agora,tanba ahi seidauk iha,” hatan Administrador Mendes.
Administrador ne’e dehan, uma hirak ne’e sei uja hotu, bainhira inagura sentru eletrika Betano, iha fulan Agustu tinan ne’e, nune’e bainaka sira mai, bele toba iha uma ne’e.
“Ami iha onakoordenasaun ba uma nain MDG, atu estadu aluga hodi oferese ba bainaka sira ne’ebe mai husi distritu 13 atu halo desmobilijasaun, iha loron 20 Agustu agora,” dehan Administrador ne’e.
