Distribuisaun kareta UNMIT nian husi Ministeriu Finansas ba ministeriu sira, Ministeriu Justisa hetan deit neen, maske antes ne’e sira husu kareta 24.
Vise Ministru Justisa, Ivo Jorge Valente, katak iha inisiu Ministeriu Justisa hato’o proposta ba Ministeriu Finansas, husu kareta hamutuk 24 maibe realidade, sira simu deit kareta neen (6).
“Maibe ami kontente no kareta sira ne’e ami intrega ona ba iha diretor sira, no balun ami aloka mos ba iha distritu,” Vise Ministru Valente dehan, iha Dili.
Tanba ne’e, nia esperansa katak, Diretor Regional sira ne’ebe hetan kareta ne’e, bele utilize didiak, hodi hala’o servisu iha baze.
“Kareta diretor nasional sira nian ne’e, ami intrega ba iha diretor regional sira, hanesan iha distritu viqueque tanba iha ne’eba kareta laiha, entaun ami intrega ida ba iha ne’eba, nune’e mos iha distritu Same no Ainaro,” Vise Ministru Valente katak.
Iha fatin seluk Deputadu Adriano Joao, hateten transporte nudar fator determinante, nune’e servisu ministeriu nian bele la’o ho diak.
“Presiza kareta ne’ebe sufsiente, tanba dala barak sira mos tenke dezloka ba distritu,” Deputadu Joao tenik.
Deputadu ne’e reforsa, katak, iha fiskalizasaun ne’ebe sira hala’o durante ne’e, identifka katak, tribunal distrital sira laiha duni transporte, tanba ne’e governu tenke tau atensaun.
Entretantu Offisiais Justisa Tribunal Rekursu, Jose Ximenes rekonese katak, tribunal distrital sira sei menus transporte, maibe situasaun mak ne’e duni.
“Tanba ita mos hatene, katak institusaun sira seluk mos sei kontinua presiza kareta, dala ruma ita husu barak maibe sira fo la tuir saida maka ita hakarak,” dehan Offisiais Justisa Tribunal Rekursu ne’e.
