Folin material konstrusaun iha Distritu Manufahi dadaun ne’e sa’e maka’as no situasaun ida ne’e halo komunidades no Sosiedade Sivil sira iha distritu ne’eba lamentavel tebes.
Reprezentante Sosiedade Sivil Sub-distritu Same ,Distritu Manufahi,Livia da Cruz hateten, folin nesesidades baziku inklui material konstrusaun agora sa’e maka’as no halo komunidade sira sosa labele.
“Sementi saku ida $10.50 sentavus, e sementi iha Dili fa’an deit ho folin $5,50 sentavus, entaun ne’e sa’e maka’as liu,” preokupa Sosiedade Sivil, da Cruz, bainihra partisipa iha workshop ‘rona povu nia lian ne’ebe organiza husi IRI, iha Same, distritu Manufahi.
Tanba ne’e nia husu ba komisaun kompetente iha Parlamentu Nasional atu tun ba halo fiskalizasaun iha fatin ne’eba, nune’e lojas nain sira labele sa’e folin sasan tuir nia hakarak.
“Kanku futun ida mos ami hola labele ona,” Sosiedade Sivil da Cruz kestiona.
Iha fatin hanesan Komunidade David da Cruz, reforsa katak,sasan iha merkadu distritu Manufahi folin sa’e maka’as, no komunidade laiha kapasidade atu hola.
“Agora material konstrusaun ninian ami sosa la kotu tanba folin sa’e maka’as,” Komunidade da Cruz preokupa.
Nia mos husu ba ministeriu kompetente atu halo intervensaun ba folin nesesidades baziku ne’ebe dadaun ne’e maka’as iha lojas no merkadu sira.
Entretantu Administrador Interinu, Adao Mendes dehan, durante ne’e ekipa inspesaun regional Ainaro halo ona inspesaun ba sasan sira ne’ebe liu prazu iha iha distritu Manufahi.
“Ami tenta atu husu relatoriu final diresaun Ainaro ninian e depois mak hato’o ba ita bo’ot sira,” tenik Administrador Interinu ne’e.
Administrador ne’e hateten, wainhira ekipa espesaun ne’e hato’o relatoriu ba admsitrasaun distritu mak foin bele hatene kompania no mos lojas sira ne’ebe mak durante ne’e hasa’e nia folin.
Alem de ne’e, nia dehan, governu iha ona planu atu estabelese armazen iha distritu sira inklui Manufahi atu bele responde inflasaun.
“Ne’ebe ita hein katak neneik ka lalais, bele responde inflasaun sira ne’e liu husi material konstrusaun sira ne’e tau tuir armazen iha distritu sira ne’e,” katak Administrador Interinu ne’e.
