Ministeriu Saude sei halo rekrutamentu ba farmasista nain lima hodi jere no kontrola iamoruk iha fasilidades saude hotu, iha tempu badak.
Ministru Sergio Gama da Costa Lobo, hateten agora dadaun Timor-Leste foin iha farmasista nain rua deit, tanba ne’e atu asegura distribuisaun aimoruk, presiza farmasista sira hodi kontrola.
“Ami buka atu kontratu tan farmasista nain hat ka lima, primeiru jere aimoruk sira iha ministeriu laran, liu-liu teritorio tomak no klasifika lista aimoruk ne’ebe uja iha kada fasilidade,” Ministru Lobo dehan, iha Parlamentu Nasional.
Tuir nia, prezensa farmasista sira importante tebes, hodi jere aimoruk sira tanba realidade ne’ebe akontese agora, lista aimoruk ne’ebe fahe ba fasilidade saude no ospital sira ne’e hanesan deit laiha diferensia.
Ministru Lobo mos husus ba funsionariu no professional saude sira, atu hato’o informasaun ba Gabinete Ministru no Vise Ministru bainhira stok aimoruk menus iha fasilidade saude sira.
Iha parte seluk, membru Komisaun F (Saude, Edukasaun, Veteranus, Igualidade), Deputadu Eladio Faculto hateten, problema falta aimoruk ne’ebe akontese durante ne’e iha setor saude, tanba falta linha koordenasaun entre ministru ho nia membrus sira iha baze.
Tanba ne’e, tuir nia, ministeriu la presiza halo rekrutamentu ba farmasista sira husi liur, maibe presiza hadia linha koordenasaun.
“Ita iha ema kualifikadu barak los, maibe ita nia koordenasaun servisu no intendementu, vontade atu servi ita nia povu mak laiha, buka mak hatun malu deit,” Deputadu Faculto katak.
