Ministeriu Justisa haruka tan advogadu privadu nain 32 ba tuir formasaun iha Cabo Verde, durante fulan rua nia laran.
Vise Ministru Justisa, Ivo Valente hateten, ministeriu aprova orsamentu ba programa ne’e hamutuk $137,000.
“Sira ba fulan rua iha ne’eba, fulan Marsu no Abril no Maiu sira fila fali mai,” dehan Vise Ministru Valente, iha Dili.
Advogadu privadu sira ne’e, Vise Ministru hatutan, sira ne’ebe durante ne’e hamahan aan iha Asosiasaun Advogadu Timor-Leste (AATL).
Tuir nia, governu presiza kapasita advogadu sira ne’e, tanba nasaun Timor-Leste foin hahu nia dezenvolvementu, no presiza rekursu humanu ne’ebe kualilidade iha setor justisa.
“Ita hare iha rai liur, governu la suporta advogadu privadu sira, maibe sira nia asosiasaun maka tau matan ba sira,” Vise Ministru Justisa katak.
Hafoin fila mai, nia dehan, advogada sira ne’e sei tuir tan estajiu, hodi aplika saida maka sira estuda durante iha ne’eba.
Nia afirma, iha tinan kotuk, governu mos suporta advogadu privadu nain sia (9) no agora hala’o hela sira nia knar nudar advogadu.
Entretantu Advogadu Sergio Hornai hateten, ne’e pasu positive ida, atu oinsa bele kapasita advogada iha rai laran.
“Governu halo ida ne’e, atu eleva ita nia konesementu kuadru pesoal husi advogadu privadu sira, bele hasae sira nia kapasidade, hau hanoin ida ne’e diak,” Advogdu Hornai katak.
Iha lidun seluk Deputadu Arao Noe, apoia katak, ne’e intensaun ne’ebe mak diak husi governu, nune’e bele aumenta rekursu humanu iha area justisa nian.
“Ita hatene katak, ita iha limitasaun barak, ne’e duni ho treinamentu sira hanesan ne’e bele hasa’e liu tan kapasitasaun,” Deptadu Noe apoia.
