Ministeriu Saude sei estabelese sentru oncology iha Ospital Nasional Guido Valadares iha tempu badak, nune’e bele fo atendementu saude ba pasientes ne’ebe hetan moras kankru.
Ministru Sergio Gama da Costa Lobo, hateten ema Timor-Leste barak mak hetan moras kankru tanba ne’e sentru ne’e presiza duni.
“Ami iha prosesu negosiasaun atu monta sentru oncology iha ne’e no medikus espesialista oncology husi liur mak sei mai iha ne’e, ajuda ita atu monta ita nia sentru ne’e tanba ita nia moras kankur barak los,” dehan Ministru Lobo, iha Dili.
Tuir Ministru Lobo, katak planu ida ne’e mos ho objetivu atu redus numeru transferensia moras ba rai liur,liu-liu moras kankru sira.
Antes ne’e, nia dehan, ministeriu hala’o ona estudu klean kona ba vantagen husi kriasaun sentru ne’e, tanba bele ajuda ema barak no medikus Timor oan sira mos bele aprende buat ruma husi medikus espesialista ne’ebe sei mai.
“Ministeriu sei esforsu atu kria kondisoens, hodi halo tratamentu iha rai laran, tanba moras kankru balun sona aimoruk deit,” Ministru Lobo katak.
Iha parte seluk membru Komisaun F (saude, edukasaun, veteranus, igualidade), Deputada Ilda Maria da Conçeicão dezafia ho planu MS nian ne’e, tanba laiha kondisoens e pior liu tan la tau orsamentu ba planu sira ne’e.
“Planu sira ne’e mesak kapaas, maibe implementasaun mak laiha,” dehan Deputada Ilda.
