Komunidade Suku Daisua,Distritu Manufahi dadaun halerik ba bee moos tanba bee moos ne’ebe uluk iha agora la funsiona no at tiha.
Xefe Suku Daisua , Alexandrino Tilman, oras ne’e dadaun komunidade sira iha area rural presiza tebes bee moos.
“Be’emos uluk iha tiha ona mais agora kondisaun la diak, e ami hato’o proposta bebeik mais to’o agora laiha respostas,” Xefe Suku Tilman hato’o, bainihra partisipa seminariu kona ba ‘rona povu nia lian’ ne’ebe organiza husi IRI,foin lalais, iha Manufahi.
Tanba ne’e nia husu ba membru Parlamentu Nasional ne’ebe sai orador iha seminariu ne’e, atu enkamina informasaun ne’e ba iha ministeriu kompetente.
Preokupasaun hanesan hato’o mos husi Xefe Aldeia Rusu, Suku Hola Rua, Joao da Costa Martinho katak, komunidade aldeia Rusu mos araska tebes ba bee moos.
Nia dehan ,preokupasaun ida ne’e hato;o ona ba iha Prezidenti Parlamentu, Senhor Fernando Lasama uluk hanesan Prezidenti Parlamentu, maibe to’o agora laiha resposta.
“Tan ne’e, ami hakarak husu ba ita bo’ot sira katak,beemoos no estradas importante liu ba ami sira ne’ebe hela iha area rural,” tenik Xefe Aldeia ne’e.
Hatan ba preokupasaun ne’e , Administrador Interinu Distritu Manufahi, Adao Mendes informa katak, defisil atu dada bee ba iha komunidade sira tanba hela iha foho leten.
Nia dehan, uluk iha ona alternativa para komunidade sira ne’ebe hela iha foho leten, atu fura bee ba komunidade maibe la konsege. “Agora iha ona alternative ida ho parseiru dezenvolvimentu sira atu ke’e bee matan, mas naun ker dizer, ema ne’e hela tiha iha foho leten bee matan tun fali iha kraik,” katak Administrador Mendes.
