Atu kombate no prevene problema mal nutrisaun iha rai laran, organizasaun Hiam Health hasa’e ona konesementu komunidade sira nian liu husi programa to’os komunidade.
Adjuntu Diretor Hiam Health (HH), Antonio Guterres hateten, antes ne’e sira sei fo uluk treinamentu ba grupu komunidade sira konaba oinsa dezenvolve to’os ida ho estandarte modern.
Programa ne’e focus liu ba iha familia pasientes (mal nutrisaun) ne’ebe durante ne’e hala’o rehabilitasaun iha sentru rehabilitasaun HH nian.
“La’os to’os familia deit, maibe ami mos dezenvolve ona to’os komunidade ho objetivu atu hasa’e ekonomia familia nian, hodi garantia nutrisaun ba saude labarik nian,” Adjuntu Guterres, iha Dili.
Programa kapasitasaun hodi implementa to’os familia alem de iha Dili, hala’o mos iha distritu Baucau, Liquisa, Ermera no Distritu Aileu, ho objetivu oinsa mak bele kuidadu sira nia oan husi mal nutrisaun.
Hahu tinan 2011 to’o 2012, ekipa husi HH fo ona treinamentu no apoia material, ekipamentus agrikultura nian ba grupus komunidade hamutuk 15, husi grupu sira ne’e kuaze 95%, sira nia ekonomia no kondisaun familia iha duni mudansa.
“Tanba sira implementa tuir konesementu ne’ebe sira hetan, iha 5% mak la iha mudansa tanba la tau importansia,” katak Adjuntu Guterres.
Enkuantu ba tinan ida ne’e (2013), nia dehan, ekipa sei fo kapasitasaun no apoia ba grupu hamutuk 29 hodi dezenvolve sira nia to’os, nune’e bele fo nutrisaun ne’ebe diak ba sira nia familia,liu-liu labarik sira.
Nia afirma, organizasaun iha espetativa bo’ot atu dezenvolve diak liu tan programa sira ne’e iha distritu seluk, ajuda governu hodi kombate mal nutrisaun ne’ebe oras ne’e numeru sei aas iha rai laran.
Entretantu familia pasiente Domingas Guterres,ne’ebe tuir ona formasaun iha sentru rehabilitasaun HH nian, apresia ba programa ida ne’e no sira prontu atu implementa tuir iha sosiedade nia le’et.
“Buat ne’ebe ami hetan iha ne’e, ami bele fahe ba komunidade ne’ebe besik iha ami nia hela fatin kona ba oinsa uja kintal hodi kuda aihoris ne’ebe bele fo nutrisaun diak ba familia,” Domingas Guterres promete.
Tuir nia, maske susar oituan tanba rai laiha (iha Dili), maibe sira kuda aihoris sira ne’ebe iha nutrisaun diak ba sira nia oan nia saude (hanesan modo no aifuan sira), koko kuda iha vazu aifunan nian diak liu, duke kuda aifunan.
Iha parte seluk, Xefe Departamentu Programa Nutrisaun iha Ministeriu Saúde (MS), João Bosco hateten, ministeriu iha ona planu estrategiku atu kombate mal nutrisaun liu husi hasa’e estatutu nutrisaun, kapasita rekursu humanu, dezenvolve programa intervensaun sira hotu.
“Maibe kombate mal nutrisaun la’os kestaun governu nian deit, maibe setor hotu-hotu hanesan tratamentu inan isin rua, asesu bee mos, asesu aihan, tanba ne’e programa multi sektoral,” dehan Xefe Bosco.
