Organizasaun feto iha politika CAUCUS, sei organiza dialogu ho komunidade,liu-liu partidus politikus iha 13 distritus, enkoraja feto sira atu partisipa diak liu tan iha eleisaun rua (Kamara Munispiu no Xefe Suku) ne’ebe sei realize iha tinan 2014.
Koordenadora Programa CAUCUS, Paula Corte Real hateten, dialogu ne’e tuir planu ne’ebe iha sei hala’o iha fulan Agostu tinan ne’e.
Tanba ne’e agora dadaun, CAUCUS buka hela fundus, liu husi gabinete asesoria sosiedade sivil nian no parseirus internasional sira hanesan UN Women tanba CAUCUS iha papel importante mak prepara feto potensial sira iha vida politika.
“Ami lakohi kleur, bainhira primeiru ministru hotu nia konsultasaun kona ba Kamara Munisipiu, ami tama kedas ho dialogu atu enkoraja feto sira hodi partisipa iha prosesu ne’e tanba lei garantia partisipasaun feto,” dehan Koordenadora Corte Real, iha Dili.
Alem de ne’e nia dehan, sira mos kontinua fo formasaun kapasitasaun ba feto potensial sira, nune’e sira bele hola parte iha eleisaun munisipiu nian. “Hanesan public speaking no seluk tan,” katak Koordenadora ne’e.
Nia hatutan, CAUCUS mos sei servisu hamutuk ho governu hodi sosializa lei Municipio ba komunidade sira bainhira hetan ona aprovasaun husi Parlamentu no devulga ona husi presidente.
Hafoin eleisaun, CAUCUS mos nafatin fo treinamentu ba membru asembleia eleitu sira liu –liu feto sira konaba knar no funsaun asembleia nian atu buat hotu bele lao tuir dalan.
Iha parte seluk, grupo feto parlamentar, deputada Florentina Smith hateten katak agora dadaun parte governu halo ona konsultasaun ba estabelesementu municipio iha teritorio tomak maibe lei seidauk iha.
Nia hatutan, sira sei esforsu atu partisipa masimu iha prosesu diskuasaun esbosu lei ne’e hodi garantia mos partisipasaun feto tanba iha konstituisaun da republika asegura ona partisipasaun ema hotu nian.
“Saida deit mak diak ba povu iha rai ida ne’e ami parlamentu prontu kontribui fo ami nia hanoin hodi produs lei ruma fasilita servisu municipio ninian,” dehan deputada Smith.
Iha parte seluk, feto potensial partido CNRT, Salustiana Simoens hateten katak liu husi kuinesementu ne’ebe durante ne’e sira hetan husi organizasaun feto sira konaba lideransa transformative feto prontu atu partisipa iha elisaun asembleia municipio tanba feto mos iha kapasidade.
“Hau espera sei sai lideransa ne’ebe diak tanba partidus sira prepara ami atu hasoru elisaun municipio nian entau ami tenke prepara ami nia an liu –liu kuinesementu, esperensia, kapasidade no abilidade atu lidera komunidade,” dehan Simoens.
