Organizasaun feto iha politika CAUCUS pronto atu kontinua fasilita membru Grupu feto Parlamentar sira ,hodi tuir workshop internasional ruma kona ba dezenvolvementu feto iha pais hotu.
Koordenadora Programa Feto Iha Politika CAUCUS, Paula Corte Real, katak CAUCUS nafatin halo aprosimasaun maka’as ho parseirus internasional sira, hanesan Kemitraan Jakarta, Koalisi Perempuan Indonesia (KPI), nune’e mos Feto Parlamentar Indonesia, atu fahe esperiensia ruma ba Feto Parlamentar Timor –Leste kona ba situasaun feto nian.
“Ami hanoin, importante nafatin fasilita referensia no aktividade brieffing hodi update informasaun foun no referensia ruma ne’ebe ita nia membru parlamentu sira, liu –liu membru feto presiza hetan,” dehan Koordenadora Corte real, iha Mascarenhas, Dili.
Alem de ne’e, nia dehan, CAUCUS mos sei organiza dialogu entre feto parlamentar ho komunidade iha distritus, iha fulan Julhu tinan 2013, divulga informasaun kona ba Konvensaun Halakon Disrkiminasaun Hotu-Hotu Kontra Feto (CEDAW), rezolusaun 1325 no lei ne’ebe promove direitu feto.
Iha parte seluk, Prezidente da Republika, Taur Matan Ruak (TMR) louva partisipasaun feto iha Parlamentu Nasional a’as liu, kompara ho nasaun sira seluk iha Asia.
“Feto nia partisipasaun iha Parlamentu Nasional maka’as no aas tebes iha rai Asia laran tomak,” Prezidente TMR louva.
Nia espera, katak Feto Parlamentar Timor-Leste sai ezemplu ne’ebe diak ba feto sira iha area sira seluk, hodi banati tuir.
Entretantu Feto Parlamentar, Deputada Florentina Smith, husu atu organizasaun feto sira, liu –liu CAUCUS atu fasilita nafatin feto parlamentar sira hodi partisipa iha seminario internasional sira, hodi hasa’e kapasidade feto iha nivel internasional.
“Esperiensia importante ne’ebe ami hetan, mak iha nasaun Filipina, sira iha lei ida atu garantia hodi hamenus mortalidade inan ho oan, enkuantu ita seidauk iha, hau hanoin hela ba futuru Timor –Leste bele adopta ida ne’e,” Deputada Smith esperansa.
Deputada ne’e promote katak, sei hato’o hanoin foun sira ne’e ba grupu feto parlamentar sira, karik bele adopta ida ne’e hodi kontribui ba feto maluk sira hotu nia vida moris lor-loron.
