Membru Parlamentu Nasional preokupa tebes ho kondisaun merkadu Hali Laran ne’ebe nakonu ho foer tanba negosiante sira soe arbiru deit no la tau iha fatin lixu ne’ebe prepara tiha ona.
Deputada Florentina Pereira Smith, dehan kauza husi soe foer arbiru ne’e halo komunidade sira iha fatin ne’eba baruk atu halo limpeza jeral.
“Hau hanoin negosiante sira mak laiha konsiensia atu soe foer iha nia fatin, tanba ne’e mak ambiente iha fatin ne’eba ne’e dois no at liu tan iha tempu kalan foer sira ne’e soe iha mota ninin sira, entaun merkadu laran dois hotu,” Deputada Smith kestiona, iha Parlamentu Nasional.
Tuir nia, la’os deit problema lixu maibe ambiente iha fatin ne’eba pior liu tanba ema sira husi foho mai fa’an sira nia sasan, sasan hotu tiha sira la fila no butuk hamutuk iha fatin ne’eba.
Entretantu Negosiante Domingos ne’ebe fa’an sasan iha merkadu Hali Laran katak, foer sira ne’ebe soe arbiru ne’e, la’os negosiante permanente mak soe, maibe husi foho mai ho kalan ne’e mak soe.
“Kareta tula foer nian mai tula foer lor-loron, maibe merkadu ne’e loke pasar malam, agora iha mota ninin fali, entaun lixu iha ne’e atu hotu ne’e susar, kareta mai tula tiha la to’o oras ida sira soe barak tan deit,” Negosiante Domingos ne’e katak.
Kona ba foer iha merkadu laran, nia dehan, lor-loron husi tuku 07 :00 dader to’o tuku 08:00 kalan Koordenador Merkadu Hali-laran sempre mai kontrola, kuandu iha negosiante balun soe foer arbiru, maka koordenador duni sira sai.
