Prezidente Taur Matan Ruak, iha planu atu implementa servisu military obrigatoriu ba joventude sira iha future, maibe antes ne’e nia parte sei hala’o uluk diskusaun ho instituisaun relevante kona ba planu ne’e.
Asesor Casa Militar Gabinete Prezidente da Republika, Frei Guterres dehan,objetivu husi planu ne’ebe ho naran “Sidadania Sivika Patriota “ ne’e, mak atu hametin sentidu nasionalismu joventude sira hodi kontribui ba defeza pais nia soberaniu no integridade territorial.
“Mai haforsa kualidade nasionalismu, sidadania, hametin konsiénsia domin joventude sira nian ba sosiedade, hametin disiplina no morál, kontribui hamenus dezempregu inklui hamenus krime sira ne’ebé bazeia ba drogas no seluk-seluk tan,” Asesór Guterres dehan, iha konferensia imprensa, iha Dili.
Tuir planu, nia dehan, Prezidente Taur Matan Ruak (TMR) sei kria diskusaun ida kona ba planu ne’e ho Casa Militár Prezidénsia Repúblika, Sekretaria Estadu Defeza, Komandante Forsa Defeza Xefe Estadu-Maiór Jenerál F-FDTL no altas patentes husi instituisaun F-FDTL nian.
Entretantu Komandante Forsa Defeza Timor-Leste (F-FDTL), Xefe Estadu Maiór Jenerál, Lere Anan Timor, apoia inisiativa ida ne’e tanba ho nune’e mak bele hametin patriotism no nasionalismu joventude sira ba nasaun ne’e.
“Maibe presiza halo diskusaun ne’ebé kle’an hodi involve entidade sira importante no mós sosiedade sivíl, nune’e, bele hetan ideas no sujestaun kona ba impaktu, vantajen no dezvantajen servisu militár obrigatóriu bainhira aplika,” Komandante Lere dehan.
Iha fatin hanesan Sekretáriu Estadu Defeza, Júlio Tomás Pinto sujere katak, presiza halo estudu komparativu ba país sira-ne’ebé uja sistema servisu militár obrigatóriu, atu nune’e bele hatene nia vantajen no dezvantajen molok atu implementa iha Timor-Leste.
Iha lidun seluk Deputada Jacinta Pereira Abucau apoia katak, planu ne’e diak maibe presiza halo sosializasaun ba komunidade sira, liu-liu ba joven sira kona ba asuntu ne’e.
“Atu nune’e sira bele iha konesementu no bele fo mos sira nia idea ruma tanba asuntu ida ne’e iha mos nia vantagen no desvantagen husi servisu military obrigatoriu ne’e,” Deputada Abucau sujere.
