Labarik vitima violensia domestika no abuzu seksual inklui insestu ne’ebe durante ne’e hela iha Uma Hakmatek Casa Vida, nain 35 konsege rekopera hikas husi traumatic hafoin tuir attividades oin-oin iha uma hakmatek ne’e.
Sekretaria Casa Vida, Juvita Xavier hateten, atividades ne’ebe sira hala’o ba labarik vitima sira ne’e mak hanesan kursu Ingles, Portugues, Komputador, Suku (hena), Arte Zenatu hanesan halo brinkus, korenti no seluk tan.
“Labarik sira ne’ebé maka partisipa iha atividade ne’e, sira hotu iha pasiensia no kapasidade, oras ne’e dadaun ami konsege redus ona labarik nia trauma durante iha ami nia aktividade ne’e,” Sekretaria Xavier dehan, foin lalais, iha Dili.
Nia hatutan, atividades ne’e sira fahe ba rua, labarik balun tuir iha parte dader no balun iha lokoraik, depende sira nia oras eskola, kuandu sira tama dader, entaun sira tuir iha parte lokoraik, nune’e ba sira ne’ebe eskola lokoraik.
“Nune’e sira nia oras eskola labele hanesan,” Sekretaria ne’e tenik.
Iha parte seluk Deputadu Eladio Faculto, fo parabens ba servisu Casa Vida nian, tanba atividades ne’ebé sira hala’o iha durante ne’e fo vantajen di’ak ba labarik nia future oin mai.
“Programa ne’e di’ak teb-tebes, tanba sira bele fo treinamentu oin-oin hodi halakon ita nia oan sira ne’ebé maka trauma ba problema ne’ebe sira hasouru,” Deputadu Faculto apresia.
Deputadu ne’e mos sujere, tenke iha medikus ruma ba labarik sira ne’e, koko sira para hatene sira trauma duni ga la’e no liu husi formasaun ne’e bele halakon sira nia trauma ga la’e “tanba liu husi mediku maka it abele hatene lolos,” Deputadu Faculto sujere.
