Komunidade Suku Funar, Sub-distritu Laklubar, Distritu Manatuto, agora dadaun halerik ba ponte tanba bainihra tempu udan, sira labele halo movimentu ba mai.
Xefe Suku Funar, Francisco Soares hateten, wainhira udan bo’ot no mota tun, mota sa’e liu fali estrada no ida ne’e difikulta estudante sira atu ultrapasa.
“Estrada ne’e kuandu udan, susar atu liu, liu-liu bainhira atu lori produtu local ba merkadu iha sub-distritu no distritu mak susar tebes,” Xefe Suku Soares, preokupa, foin lalais, iha Suku Funar, Laklubar.
Tanba ne’e nia husu ba governu, atu tau matan ba sira nia preokupasaun ne’e, tanba ponte ne’e importante tebes ba komunidade atu ultrapasa bainhira udan bo’ot.
“Kondisaun ne’e akontese kleur ona,” Xefe Suku Funar ne’e sujere.
Hatan ba preokupasaun ne’e, Sekretariu Estadu Obras Publiku (SEOP), Luis Vaz Rodrigues katak, nia parte hetan ona informasaun kona ba ida ne’e husi Sekretariu Estadu Politika Formasaun Profesional e Empregu (SEPFOPE).
“Sira haruka surat mai iha Ministeriu Obras Publiku atu husu valley bridge (jembatan besi) hodi tau iha ne’eba maibe to’o ogora seidauk iha,” Sekretariu Estadu Rodrigues katak.
Maibe nia hatutan, karik bele uja maneira seluk hodi responde ba asuntu ne’e atu nune’e komunidade bele ultrapasa ho diak mesmu udan.
Iha lidun seluk Deputada Albina Marcal hateten, governu presiza hare, atu nune’e komunidade sira bele asesu ba estrada ne’ebe maka diak.
“Karik agora dadaun sira sei prepara hela ekipamentus ne’ebe maka sira presiza, maibe tenke ho adekuadu no lalais halo atendementu ba asuntu ne’e,” dehan Deputada Marcal.
