Polisia Servisu Investigasaun Kriminal ate agora seidauk identifika autor ba kazu soe bebe ne’ebe akontese iha area Vilaverde nian iha fulan kotuk (Abril).
Maske nune’e Diretor Servisu Investigasaun Kriminal (SIK), Superintendente Calisto Gonzaga hateten, prosesu investigasaun tama ona iha Ministeriu Publiku (MP) no agora la’o hela.
“Ita presiza hein, ne’e la’os prosesu ne’ebe maka fasil, tanba momentu soe bebe ne’e ema ida mos la hare, entaun defisil oituan,” Diretor SIK, Superintendente Gonzaga dehan, foin lalais,iha Kaikoli, Dili.
Akontesementu ne’e rasik akontese iha dia 16 Abril 2013, iha area Vilaverde nian, bebe ne’e deskobre husi komunidade iha lixu fatin ho kondisaun moris.
“Agora dadaun labarik ne’e iha hela familia ne’ebe maka hetan, sei fo susu hela, no ami tenta nafatin atu buka suspeitu ne’ebe maka halo aksaun ne’e,” Diretor SIK tenik.
Entretantu Deputada Maria Rosa da Camara “Bi Soi”, dehan, ne’e papel Polisia SIK nian, buka meius oinsa atu hetan suspeitu ba kazu ne’e.
“Ne’e krimi ida,” Deputada Bi Soi katak.
Tuir nia, hahalok ida ne’e mosu tanba dalabarak mane sira mak laiha responsabilidade bainhira feto sira isin rua.
Deputada ne’e mos, husu ba governu atu fo treinamentu hasa’e kapasidade ba fero sira hanesan ne’e, nune’e bainira sira hasouru situasuan defisil hanesan ne’e, sira fiar an no halo hahalok ne’ebe diak.
