Ministru Saude, Sergio Gama da Costa Lobo ameasa sei hasai medikus ne’ebe haruka pasiente sira ba sosa aimoruk iha liur (Klinika Privadu) sira, tanba ne’e la’os pasiente nia responsabilidade.
Maske Ministru seidauk simu keixa ruma kona ba problema ida ne’e maibe nia sempre rona kestaun ne’e.
Ministru dehan, se ema ruma hato’o keixa katak ida ne’e akontese duni mak sei iha sansaun ne’ebe todan ba medikus ne’ebe haruka pasiente sosa aimoruk iha liur.
“Maske aimoruk iha fasilidades saude laiha, pasiente labele lori reseita ba sosa aimoruk iha liur, se ita hetan lori mai entrega hau, doutor ne’e hau hasai kedas husi ospital tanba ne’e labele,” dehan Ministru Lobo, (14/05), iha Parlamentu Nasional.
Tanba ne’e nia husu ba mediku sira atu labele haruka sai reseitas ba liur maske aimoruk iha fasilidades saude laiha, tanba ne’e kompetensia ospital nian atu sosa iha ne’ebe deit.
Entretantu Deputada Albina Marçal hateten, la’os deit haruka pasiente sosa aimoruk iha liur maibe mos abandona pasiente iha ospital hodi halao servisu iha klinika privado sira.
Kestaun ne’e sai prekupasaun membrus deputadu sira nian no husu ba ministerio atu tau atensaun ba problema ne’e tanba lei ministeiru nian la premite ida ne’e.
“Hau hanoin katak ida ne’e ladun diak tanba dala ruma emfermeirus sira ne’ebe servisu iha ospital la fo atensaun ba pasiente sira maibe ba fali iha klinika privada sira atu faan aimoruk,” dehan Deputada Marçal.
