Problema faltas oksigeniu iha Ospital Referral Oe-Cusse no Ospital Referal sira seluk iha rai laran bele resolve iha tempu badak, tanba dadaun ne’e Ministeriu Saude hala’o hela prosesu tenderizasaun ba kompania sira hodi distribui oksigeniu ba fasilidades saude.
Tuir Ministru Saude, Sergio Gama da Costa Lobo katak, ne’e kompetensia Agensia Servisu Autonomo Medikamentus ba Ekipamentus de Saude (SAMES) nian maibe dadaun ne’e labele halo distribuisaun tanba makina produsaun at hela.
“Ami halo hela prosesu tenderizasaun atu hetan kompania foun ida hodi bele halo distribuisaun oksigen ba iha fasilidade saude tanba oksigen ne’e so iha
Dili deit mak ba sira fasilidade, labele sosa husi fatin seluk,” dehan Ministru Lobo, (14/05), iha Parlamentu Nasional.
Entretantu membru Komisaun F Parlamentar( saude , edukasaun, kultura, veteranus no igualidade jeneru), Deputadu Eladio Faculto preokupa katak, oksigeniu ne’ebe sentraliza deit iha Dili, afeta tebes ba servisu Pesoal Saude sira iha distritus, liu-liu iha Oe-Cusse.
Tanba ne’e nia husu ba Ministeriu Saude atu aselera lalais prosesu tenderizasaun nune’e bele normalize fali distribuisaun oksigeniu ba iha fasilidade saude hotu tanba atu halo operasaun ruma presiza oksigeniu.
“Ita nia maluk ida husi Pasabe mate deit iha dalan klaran bainhira lori nia mai iha Ospital Referal Oe-Cusse tanba oksigen laiha,” preokupa Deputadu Faculto.
Iha sorin seluk, Deputada Ilda Maria da Conçeicao, dezafia politika ministerio nian hodi minimize transferensia moras husi distritu mai nasional tanba buat hotu sentraliza iha nasional deit.
“Iha Ospital Referral Maliana laiha oksigen doutor sira dehan sira bele halo operasaun ba pasiente sira maibe laiha oksigen sira labele halo buat ida,” kestiona Deputada Ilda.
