Embaixada Australia no Nova Zelandia loke programa estagiu ba bolseirus Timor oan ne’ebe remata no gradua ona iha Instituisaun Governu nian, atu nune’e sira bele aplika matenek ne’ebe sira hetan durante iha sira nia estudu.
Tuir Embaixador Australia iha Timor-Leste, Miles Armitage katak, programa estagiu ne’e fo oportunidade ba graduadu bolseirus husi nasaun rua ne’e, atu fo sira nia kontribuiasaun direita ba dezenvolvenmentu Timor-Leste.
“Iha tinan ne’e Komisaun Funsaun Publiku no bolsu estudu Australia nian iha Timor-Leste, fo ona fatin ba estagiu nain hat, iha area tekniku informasaun no dezenvolvementu internasional,” dehan Embaixador Armitage, foin lalais, iha Tower Fatuhada, Dili.
Iha fatin hanesan Ministru Edukasaun, Bendito Freitas konsidera programa ne’e diak, oinsa para bele fasilita estudante sira ne’ebe mak remata ona estudu iha nasaun rua ne’e atu bele halo sira nia estagiu iha institusaun governu nian.
“Estudante sira ne’ebe maka graduadu husi Australia no sira mai hola parte iha internship (estagiu), iha instituisaun governu nian, ne’e hau hanoin katak buat nebe maka diak tebes-tebes,” dehan Ministru Freitas.
Nia hatutan, programa ne’e mos fasparte husi oinsa para sira bele fo sira nia kontribuisaun ba nasaun Timor-Leste.
“Sira bele sai hanesan instrumentu diak ba ita nia dezenvolvementu, tanba ho kapasidade no matenek ne’ebe maka sira iha, ne’ebe sira hetan iha nasaun Australia” dehan Ministru Freitas.
Ministru mos rekonese katak, agora dadaun nasaun Timor-Leste komesa ona iha rekursu humanu komesa iha dadauk ona.
Iha fatin seluk Responsabel Internship Programa, Maria Braz hateten, desde hahu iha tinan 2010, totalmente estudante ne’ebe maka involve ne’e hamutuk 17 pesoas.
“Grupu walu remata estagiu no agora servisu ona, agora atu komesa ne’e iha nain hitu, nain hat komesa tiha ona no seluk sei mai fali iha Junu no Julhu,” dehan Responsabel Braz.
Nia hatutan katak, finansiamentu ba projeitu ida ne’e mai husi Governu Australia no Nova Zelandia,
hanesan fo tulun atu sira bele hetan empregu.
