Tuir Vise Dekanu asuntu akademika Fakuldade Edukasaun, Artes no Humanidades Universidade Nasional Timor Lorosa’e, Pedro Soares katak atu estudantes ida iha kualidade iha nia estudu, depende ba
estudantes rasik inklui mos mestre ka mestra ne’ebe hanorin.
Nia dehan, estudantes sira sai kualidade kuandu sira rasik iha vontade atu estuda no mos ema ne’ebe
forma (mestre ka dosente) inklui mos preparasaun instituisaun ho kondisaun hotu-hotu atu bele
kualifika ema ne’ebe mak estuda iha universidade ne’e.
“Ba hau kualidade ba graduadu ne’e katak, ema sira ne’ebe sai husi iha nia area de estudu, nia bele hala’o servisu ruma iha kampu de trabalhu,” dehan Vise Dekanu Pedro Soares, foin lalais, iha SEntru Konvensaun Dili.
Nia afirma tan katak, atu hare estudante ka graduadu ida sai kualidade, hare nia mos durasaun halo estudu, forma ema ho ninia durasaun no ema ninia kapasidade.
“Tuir kurikulum ema ida kuandu hasai lisensiatura nia durasaun kuatru anos maibe iha estudantes balun mos ho nia kualidade ne’ebe mak diak, antes kuatru anos nia bele hotu wainhira nia kapasidade bele to’o, maibe iha tinan ida deit laiha,” tenik Vise Dekanu Soares.
Kona ba universidade balun tinan ida deit nia estudantes bele remata nia estudu, nia sujere presiza hare fila fali, nune’e bele kualifika Timor oan sira hodi servi ba nasaun ida ne’e.
Entretantu Lisensiatura Ekonomia Dezenvolvimentu UNTL, Silvino Lopes ne’ebe foin gradua iha UNTL katak, pronto atu compete buka servisu tuir matenek ne’ebe nia hetan durante iha nia estudus iha universidade.
“So ke kampu de trabalhu mak ita hare la sufsiente, tanba ne’e ami husu ba governu atu kria kampu servisu baa mi sira ne’ebe gradua tiha ne’e,” sujere graduadu Lisensiatura Ekonomia Dezenvolvementu ne’e.
Entretantu tuir Deputadu Felisberto Monteiro katak, lisensiatura balun haruka halo karta deit mos sira la hatene.
“Iha inan aman ida husi Sub-distritu Ossu ne’ebe nia oan remata estudu iha UNTL durante tinan hat, hateten ami nia oan ne’e eskola iha UNTL tinan hat e nia wisuda tiha fila mai ami haruka deit halo surat mos la hatene,” Deputadu Monteiro sita liafuan inan aman ne’e.
