Organizasaun Fundasaun Mahein rekomenda ba Komisaun B Parlamentar hodi ejiji ba governu atu harii lalais Komisaun Investigasaun ida hodi halo peskiza ba kilat ne’ebe PNTL sosa iha tinan kotuk (2012) la ho prosesu ne’ebe maka transparansia.
Diretor Interino Fundasaun Mahein (FM), Joao Almeida Fernandes hato’o kestaun ne’e tanba Konselhu Ministru seidauk aprova prosesu hatama kilat ne’e maibe kilat tama mai ona.
“Komando Jeral PNTL fo sai publikamente kilat PM2-V1 katak tama ona iha Timor- Leste,” kestiona Diretor Interino FM, Joao Almeida Fernandes, foin lalais, iha Balide, Dili.
Nia dehan, kilat PM2-V1 ne’e rasik sosa iha Indonezia iha PT.PINDAD hamutuk 75 pucuk ho nomor seri 0001-00075, e kilat ida ne’e PNTL mak uja primeira vez iha mundu.
“Parlamentu Nasional presiza ejiji nafatin ba governu atu harii lalais komisaun investigasaun ba kilat ne’ebe hatama la ho prosesu ne’ebe transparante iha inisiu tinan 2013,” sujere Diretor Interino FM ne’e.
Iha fatin seluk Prezident Komisaun B (Seguransa Nasionais, Defeza no Negosio Estrangeiru), Deputada Maria Lurdes Bessa hateten, komisaun simu ona relatoriu husi FM kona ba asuntu ne’e no agora dadaun sira konsentra hela ba kestaun ne’e.
“Ami husu duni atu halo ekipa investigasaun ida, ida ne’e la’o hela, e ami labele fo sai buat hotu-hotu ba publiku maibe konserteza prosesu la’o hela,” dehan Prezidente Bessa.
Komisaun mos bolu ona Komisariu Jeral Polisia Nasional Timor –Leste (PNTL), mai iha plenaria hodi esplika kona ba akuzasaun kilat sira ne’e.
“Ami husu para investiga, tanba ami mos iha duvidas kona ba prosesu sosa kilat ne’e,” dehan Deputada Bessa.
