Universidade Nasional Timor Lorosa’e entrega tan medikus foun hamutuk 236 ba Ministeriu Saude atu reforsa tan servisu atendementu saude ba povu iha nasaun ida ne’e.
Reitor Universidade Nasional Timor-Lorosa’e (UNTL), Aurelio Guterres katak, universidade nia papel mak prepara rekursu humanu ne’ebe ho kualidade maibe atu kria kampu servisu ne’e kompetensia governu nian.
“Ami espera katak sira bele hala’o servisu ho diak hodi kontribui ba ita nia sosiedade para bele moris livre husi moras hotu,” esperansa Reitor UNTL, Aurelio Guterres,iha serimonia graduasaun ba estudante finalist sira, foin lalais, iha Sentru Konvensaun Dili.
Enkuantu graduadus 236 ne’e kompostu husi mediku jeral iha nain 70, diploma enfermagen iha 69,diploma parteiras hamutuk nain 55, lisensiatura enfermagen no Obstetric hamutuk 42 e sira hirak ne’e agora sei hela konkorsu husi Ministeriu Saude.
Entretantu Graduadu Amaro Assuncão Corgino Correia, promete katak nudar jerasaun foun Timor nian sira prontu atu servi povu ho matenek espesialidade ne’ebe sira iha.
“Saude ne’e direitu povu nian atu hetan, tanba ne’e ami prontu atu koloka iha fatin ne’ebe deit maske hasoru difikuldade oi-oin,” dehan medikus foun ne’e.
Nia mos promote katak, sei esforsu an atu servisu ho situasaun ne’ebe nasaun ne’e infrenta liu –liu fasilidade no ekipamentus balun ne’ebe seidauk sufsiente relasiona ho sira nia profisaun ne’ebe iha.
Medikus hirak ne’e hala’o estudu iha Kuba durante tinan lima no kompleta tinan rua iha Universidade Nasional Timor Lorosa’e hamutuk ho pesoal sira seluk atu konese diak liu tan sistema atendementu iha rai laran rasik antes hala’o knar nudar profesional saude.
