Desde inisiu to’o agora, programas Sekretaria Estadu ba Promosaun Igualidade nian seidauk tama to’o iha sukus tanba iha limitasaun ba rekursu humanus.
Sekretaria Estadu ba Promosaun Igualidade (SEPI), Idelta Maria Rodrigues hateten, sira estabelese ona ekipa konjunta ne’ebe mak servisu iha distritus inklui Fokal Poin sira no sira seidauk tama to’o iha sukus tanba kapasidade finansia ne’ebe sei limitadu.
Maske nune’e nia dehan, SEPI mos hala’o ona sira nia programa liu husi Radio Komunidade sira iha distritus hotu no TLMDC, hodi halo desiminasaun informasaun ba feto iha setor hotu ba komunidade sira.
“Hau rekonese katak to’o agora SEPI seidauk perkore suku hotu-hotu, ne’e klaru, tanba ami iha limitasaun rekursu humanu,” dehan SE Idelta Maria Rodrigues, (03/05), iha Dili.
Alem de ne’e nia dehan, SEPI mos uluk transmite sira nia programa liu husi Televizaun Timor-Leste (TVTL) no ba tinan ida ne’e sira sei halo akordu ida ho jornal Timor Post kona ba igualidade update jornal.
“Tanba ami hanoin liu husi ne’e bele ajuda populasaun atu koñese saida maka SEPI sira halo,” tenik SE Rodrigues.
Nia dehan, iha pajina ne’e SEPI sei hakerek kona ba progresusu no programa sira ne’ebé refleta ba feto nia situasaun no iha tinan kotuk sira halo programa transferensia publiku kona ba hakbi’it feto nia ekonomia.
Iha parte seluk membru Komisaun F(Edukasaun, Saúde, Geñeru), Deputada Bendita Monis hateten iha fiskalizasaun komisaun nian durante ne’e iha distritus, haree katak SEPI nia servisu ladauk másimu.
“Iha areia rurais liu-liu ba feto sira seidauk asesu ba vokasial, la asesu ba justisa no ladauk asesu ba informasaun,” tenik Deputada Monis.
Tanba ne’e nia sujere ba SEPI atu tun ba baze hodi rona direitamente povu nia lamentasoens, rona saida mak feto rural sira infrenta durante ne’e, depois lori mai halo diskusaun.
