Atu kria aula lian Ingles ne’ebe interesante no kreativu, Fakuldade Edukasaun, Artes no Humanidades UNTL hamutuk ho ETELP organiza seminariu gratuita ba profesores lian Ingles sira iha Timor-Leste.
Kevin Dalton, Public Relation Manager Indonesian Australia Language Foundation (IALF) iha nia introdusaun katak, seminariu ne’e foka liu ba metodu pratiku no tekniku ne’ebe mestre no mestra sira bele aprende no implementa iha sira nia aula rasik.
Dalton esperansa katak, hafoin seminariu ne’e mestre no mestra lian ingles sir abele halo furak liu aula lian ingles iha eskolas ho ideas foun ne’ebe sira hetan no ho dalan ne’ebe interesante ho nune’e mestre no alunus sira bele enjoy english language classroom.
“That’s happen, I’m happy with that,” dehan Kevin Dalton, Public Relation Manager IALF, foin lalais, iha Salaun Auditorium Universidade Nasional Timor Lorosa’e (UNTL), Liceu, Dili.
Nia rekonese katak, iha mestre /a balun iha konesementu no hanorin diak, so ke sira presiza atu komprende tanba Ingles hanesan lian ne’ebe susar tebes no mestre barak mak iha problema e estudantes pior liu tan.
Tanba ne’e nia husu ba mestre/a sira atu servisu hamutuk hodi ajuda malu iha ingles, mestre sira iha responsabilidade atu ajuda estudantes, nune’e estudantes iha responsabilidade atu kolabora hamutuk hodi aprende lian ingles.
“So that the english get better,” tenik Dalton.
Seminariu ho titlu ‘Creating Interesting English Language Classes’ ne’e partisipa husi mestre no mestra hamutuk 150 inklui estudante semester hitu (7) no walu (8) husi departementu Ingles nian.
Iha fatin hanesan Mestre Jose Viegas, husi Eskola Esternato Sao Jose Dili ne’ebe partisipa iha seminariu ne’e, sente kontente no promote sei aplika metodu no tekniku foun ne’ebe sira hetan, iha sira nia klase.
“La’os deit hanorin ho grammar maibe nudar mestre ba lian ingles hanesan ohin dehan, katak bele liu husi games no rona muzika ingles nian, atu nune’e estudantes sira labele bosan aprende lian ingles,” tenik Mestre Viegas.
Maske nune’e nia dehan,la fasil atu implementa buat sira ne’e tanba iha sira nia eskola rasik sei menus fasilidades.
Entretantu English Language Training Advisor iha East Timor English Language Program (ETELP), Ayu Kusumastuti hateten, seminariu ida ne’e foin primeira ves hala’o iha Timor-Leste.
“Atu ajuda mestre lian ingles sira iha Timor-Leste,liu-liu iha distritu sira, aumenta sira nia konesementu iha hanorin, sira nia skill nune’e sira bele hanorin diak liu tan estudantes iha sira nia klase,” dehan Advisor Kusumastuti.
Kona ba karik seminariu hanesan sei kontinua iha future, nia dehan sira sei hare rezultadu husi seminariu ida ne’e, tanba ida ne’e presiza responsabilidade bo’ot maibe la taka dalan atu labele kontinua iha future.
Seminariu loron ida ne’e finansia husi Governu Australia liu husi Australian AID.
