Sekretaria Estadu ba Promosaun Igualidade Grupu, Idelta Maria Rodrigues hateten, iha tinan 2013 ne’e Grupu Feto husi Distritu Lospalos no Aileu sei tuir formasaun kona ba oinsa produs aifuan sai jus.
Sekretaria Estadu dehan, sira nia parte identifika ona grupu feto husi distritu rua ne’e, mak grupu feto sira husi Suku Mehara (Lospalos) no grupu feto Aileu nian.
Nia dehan, SEPI asina ona akordu ho Ministra Asuntu Feto nia husi Indonezia no konkorda sei haruka sira nia ema hodi fo formasaun ba grupu feto sira ne’e iha fulan oin.
“Durante ne’e ita iha jus ai nanas no sira seluk, tanba ne’e formador sira ne’e sei hanorin diak liu tan oinsa halo jus ho aifuan sira,” katak SE Rodrigues.
Razaun hili Suku Mehara tanba tuir observasaun iha terenu nota katak Suku Mehara iha rai hektares bo’ot ida ba produsaun ai nanas no ida ne’e bele ajuda programa merenda escolar iha eksola sira.
Entretantu tuir Deputada Bendita Magno Monis katak, kooperativa barak mak SEPI kria ba grupu feto sira iha distritus maibe problema mak SEPI la tun ba baze hodi kontrola.
“SEPI tenke tun haree kooperativas ne’e nia susesu to’o iha ne’ebe, la susesu tanba saida, ita tenke hatene, labele fo tiha osan husik deit nune’e,” sujere Deputada ne’e.
